Malayalam cinema | MeToo – मॉलिवूड अर्थात मल्याळम सिनेसृष्टीतील सेक्स स्कँडल आणि मीटूची प्रकरणे ही रोज नव्याने समोर येत आहेत. हेमा समितीचा अहवाल समोर आल्यानंतर सुरु झालेली आरोपांची मालिका थांबण्याचे नाव घेत नाही. आता एका दिग्दर्शकावर केरळमधल्या अभिनेत्रीने आरोप केला आहे. मला त्या दिग्दर्शकाने सेक्स स्लेव्ह बनवले असा आरोप या अभिनेत्रीने केला आहे.

मी त्यावेळी १८ वर्षांची होते, अगदीच नवखी होते. माझे महाविद्यालयीन शिक्षण सुरु होते. मी एका मध्यमवर्गीय घरातली मुलगी होते. माझ्या आई वडिलांना सिनेमा, सिनेसृष्टी याबाबत नीटसे माहीतही नव्हते. मला सिनेमात काम करण्याची संधी मिळाली कारण मी महाविद्यालयात नाटकांमध्ये काम करत होते. अभिनेत्री रेवती यांचा माझ्या आयुष्यावर लहानपणापासून प्रभाव होता. त्यांचे चित्रपट मी पाहिले होते. तसेच आम्ही जिथे राहात होतो त्याच परिसरात रेवती यांचेही घर होतं. असे या अभिनेत्रीने सांगितले.

अभिनेत्री म्हणाली, तामिळ सिनेसृष्टीत काम करणाऱ्या दिग्दर्शकाने माझा लैंगिक छळ केला. मला त्याने सुरुवातीला सांगितले की तू माझ्या मुलीसारखी आहेस. मात्र नंतर त्याने माझे शोषण करण्यास सुरुवात केली. मी १८ वर्षांची होते तेव्हा मला लैंगिक शोषणाचा सामना करावा लागला. तो माझा पहिला तामिळ चित्रपट होता.

तो दिग्दर्शक माझ्यावर दबाव आणत होता, त्याने माझे शोषण केले. त्याने त्याच्या पत्नीशी माझी ओळख करुन दिली आणि सांगितले ही आपल्या सिनेमातली मुख्य अभिनेत्री असेल ही तर मला अगदी मुलीसारखी आहे. मात्र नंतर त्याच्यातला हैवान जागा झाला. त्याने वर्षभर माझ्यावर बलात्कार केला. असा गंभीर आरोप या अभिनेत्रीने केला आहे.

दिग्दर्शकाचे नाव मी जाहीर करणार
या अभिनेत्रीने पुढे सांगितलं की या प्रकरणातला जो दिग्दर्शक आहे त्याचे नाव मी सरकारच्या विशेष तपास समितीपुढे मांडणार आहे. ज्याने माझे शोषण केले तो दिग्दर्शक आणि त्याची पत्नी दोघंही माझ्याशी चांगले वागायचे, मला लागतील तेव्हा पैसे द्यायचे, चांगले खायला द्यायचे, मिल्कशेक, आईस्क्रीम्स मागवायचे. ही सगळी सुरुवातीची प्रक्रिया होती. एक दिवस असा आला की सगळेच विपरित घडू लागले.

बलात्कारानंतरही सांगायचा ही माझी मुलगी आहे
अभिनेत्री म्हणाली, की माझे शोषण टप्प्याटप्प्याने सुरु झाले. अनेकदा माझा विनयभंग करायचा, त्यानंतर त्या दिग्दर्शकाने माझ्यावर वर्षभर बलात्कार केला. एवढेच नाही तर तो निलाजरेपणाने सगळ्यांसमोर मला ही माझी मुलगी आहे, माझ्या मुलीसारखी आहे असेही सांगायचा. अशी आपबिती या केरळच्या अभिनेत्रीने सांगितली आहे.