Maval News – माळवाडी गावात जल जीवन मिशन अंतर्गत नूतन नळपाणी पुरवठा योजनेचा उद्घाटन समारंभ पार पडला. नवनिर्वाचित जिल्हा परिषद सदस्य पल्लवी दाभाडे आणि पंचायत समिती सदस्य दिलीप ढोरे यांच्या हस्ते योजनेचे उद्घाटन करण्यात आले. या योजनेअंतर्गत ४.०६ लाख लिटर क्षमतेची नळपाणी पुरवठा व्यवस्था उभारण्यात आली आहे. सुमारे ४ कोटी ४९ लाख निधीतून साकारलेल्या या योजनेमुळे गावात शुद्ध आणि नियमित पाणीपुरवठा उपलब्ध होणार आहे. या कामासाठी आमदार सुनील शेळके यांच्या माध्यमातून निधी उपलब्ध झाल्याचे यावेळी सांगण्यात आले. सहकार क्षेत्रातील माऊली दाभाडे यांच्या मार्गदर्शनाखाली तसेच आमदार सुनील शेळके यांच्या प्रयत्नांतून गेल्या काही वर्षांत माळवाडीमध्ये विविध विकासकामे मार्गी लागली असून ग्रामस्थांच्या सहकार्यामुळे गावाचा कायापालट होत असल्याचे मान्यवरांनी नमूद केले. यापुढेही अधिकाधिक निधी उपलब्ध करून माळवाडी तसेच इंदोरी-वराळे गटाचा सर्वांगीण विकास करण्यासाठी कटिबद्ध राहू, अशी ग्वाही उद्घाटक पल्लवी दाभाडे आणि दिलीप ढोरे यांनी व्यक्त केली. कार्यक्रमास गावचे सरपंच, उपसरपंच, ग्रामपंचायत सदस्य, पदाधिकारी, ग्रामस्थ आणि कार्यकर्ते मोठ्या संख्येने उपस्थित होते.
