पिंपरी  – वाकड येथील प्रिस्टीन प्रो लाईफ इमारतीमधील व्यावसायिक दुकानांना रविवारी (दि. २५) पहाटेच्या सुमारास अचानक भीषण आग लागली. या दुर्घटनेत ६ ते ७ दुकाने जळून खाक झाली आहेत.

सणासुदीच्या पार्श्वभूमीवर दुकानदारांनी दिवाळीच्या विक्रीसाठी दुकानांमध्ये कोट्यवधी रुपयांचा माल भरून ठेवला होता. मात्र, क्षणात लागलेल्या या आगीत हा सर्व साठा भस्मसात झाल्याने व्यावसायिकांचे कोट्यवधी रुपयांचे नुकसान झाल्याचा प्राथमिक अंदाज व्यक्त करण्यात येत आहे.

पहाटे सुमारे ०३:५६ च्या सुमारास प्रिस्टीन प्रो लाईफ येथील दुकानांना आग लागल्याची वर्दी स्थानिक नागरिक उज्ज्वल गुप्ता यांनी अग्निशमन केंद्राला दिली. पहाटेची वेळ असल्याने रस्त्यांवर वाहतूक नव्हती, ज्यामुळे अग्निशमन वाहनांना विनाअडथळा घटनास्थळी धाव घेणे शक्य झाले.

घटनास्थळावर पोहोचताच आगीची भीषणता लक्षात घेऊन रहाटणी केंद्राच्या जोडीला थेरगाव उप अग्निशमन केंद्र व मुख्य अग्निशमन केंद्राच्या गाड्या तातडीने मदतीला पाचारण करण्यात आल्या. सहा ते सात दुकानांमधून आगीचे लोट बाहेर पडत होते आणि शटर बंद असल्याने जवानांसमोर मोठे आव्हान होते.

जवानांनी तात्काळ वाहनाच्या विंचच्या (Winch) साहाय्याने बंद शटर तोडून आत प्रवेश केला आणि होज रीलच्या मदतीने सर्व बाजूंनी पाण्याचा मारा सुरू केला. ज्या दुकानांमध्ये आग धुमसत होती, तिथे कुलिंग ऑपरेशन राबवण्यात आले.

आग शेजारील इतर व्यावसायिक गाळ्यांमध्ये पसरून वित्तहानी आणखी वाढू नये, यासाठी उर्वरित दुकानांवर पाण्याचा शिडकाव करत अत्यंत कौशल्याने सॅलवेज (मालमत्ता संरक्षण) ऑपरेशन राबवण्यात आले. जवानांच्या अथक प्रयत्नांमुळे काही तासांत आग पूर्णपणे आटोक्यात आणण्यात आली.

या आगीत सुदैवाने कोणतीही जीवितहानी झाली नसली, तरी दिवाळीच्या तोंडावर कोट्यवधी रुपयांचे व्यावसायिक नुकसान झाल्याने दुकानदारांवर मोठे संकट ओढवले आहे. आग लागण्याचे नेमके कारण अद्याप समजू शकलेले नाही.

pune : नऊ वर्षीय मुलीच्‍या रक्‍ताची फेरतपासणी