पिंपरी – लाडक्या गणरायाच्या आगमनापूर्वीच शहरातील बाजारपेठांमध्ये देखील चैतन्‍य संचारले होते. गेल्‍या आठ दिवसांपासून बाजारांमध्ये असलेल्‍या गर्दीने सोमवारी उच्‍चांक गाठला.

गणेश चतुर्थीच्या दिवशीही सकाळपासूनच गणेशमूर्ती, फुले, हार, पूजेचे साहित्य, मोदक, मिठाई, सजावटीच्या वस्तू आणि विद्युत रोषणाईच्या साहित्याची खरेदी करण्यासाठी नागरिकांनी मोठी गर्दी केली होती. गणेशोत्सवामुळे शहरातील विविध बाजारपेठांमध्ये कोट्यवधी रुपयांची उलाढाल झाल्याने व्यापाऱ्यांमध्येही उत्साहाचे वातावरण होते.

गणेशोत्सव हा धार्मिक उत्सव असला तरी त्याला मोठ्या आर्थिक उलाढालीची जोड असते. गणेशमूर्ती विक्रेत्यांपासून फुलविक्रेते, मिठाई दुकानदार, पूजा साहित्य विक्रेते, सजावटीचे साहित्य विक्रेते, मखर तयार करणारे कारागीर, विद्युत रोषणाईचे व्यावसायिक यांच्यासह विविध छोट्या-मोठ्या व्यावसायिकांना या उत्सवामुळे मोठा व्यवसाय मिळतो. त्यामुळे गणेशोत्सवाच्या काळात बाजारपेठेतील आर्थिक व्यवहारांना मोठी चालना मिळते.

गणेश चतुर्थीच्या आदल्या दिवसापासूनच गणेशमूर्ती विक्रीच्या स्टॉलवर नागरिकांची गर्दी झाली होती. घरगुती गणपतींसाठी विविध आकार आणि आकर्षक रूपातील मूर्तींना मागणी होती. पर्यावरणपूरक शाडू मातीच्या मूर्तींनाही यंदा नागरिकांनी पसंती दिली. अनेकांनी आपल्या घरातील सजावटीच्या मखराला अनुरूप गणेशमूर्तीची निवड केली.

घरगुती तसेच सार्वजनिक गणेश मंडळांच्या सजावटीसाठी विविध प्रकारच्या वस्तूंची मोठ्या प्रमाणात खरेदी करण्यात आली. फुलांच्या माळा, कृत्रिम फुले, तोरणे, पडदे, मखर, विविध आकारांच्या लाइट्स, एलईडी दिवे, विद्युत माळा आणि अन्य सजावटीच्या साहित्याला मागणी होती.

आकर्षक आणि आधुनिक पद्धतीच्या सजावटीकडे नागरिकांचा कल असल्याचे विक्रेत्यांनी सांगितले. गणेशोत्सवामुळे निर्माण झालेल्या या खरेदीच्या वातावरणामुळे शहरातील व्यापाऱ्यांना चांगला व्यवसाय मिळाला. शेवटच्या क्षणापर्यंत सुरू असलेल्या खरेदीमुळे बाजारपेठांमध्ये दिवसभर उत्साहाचे वातावरण होते.

फुले, हार आणि पूजासाहित्याची विक्री
गणेश चतुर्थीच्या दिवशी फुलांच्या बाजारातही मोठी उलाढाल झाली. झेंडू, गुलाब, शेवंती यांसह विविध फुलांचे हार, दुर्वा आणि पूजेसाठी आवश्यक साहित्य खरेदी करण्यासाठी नागरिकांची गर्दी झाली होती. गणरायाच्या प्रतिष्ठापनेपूर्वी पूजा साहित्य खरेदी करण्यासाठी अनेकांनी बाजारपेठ गाठली. त्यामुळे सकाळच्या वेळेत बाजारपेठांमध्ये मोठी वर्दळ होती.

मोदक, मिठाईलाही मागणी
गणेशोत्सवातील महत्त्वाचा नैवेद्य असलेल्या मोदकाला यंदाही मोठी मागणी राहिली. उकडीचे मोदक, तळलेले मोदक, मावा आणि विविध स्वादांतील मोदक विक्रीसाठी उपलब्ध होते. त्यासोबतच पेढे, लाडू, बर्फी आणि इतर मिठाईचीही मोठ्या प्रमाणात खरेदी झाली. गणेश चतुर्थीच्या दिवशी अनेक मिठाईच्या दुकानांमध्ये ग्राहकांची गर्दी दिसून आली.

शेवटच्या क्षणापर्यंत खरेदीची लगबग
गणेश चतुर्थीच्या आदल्या रात्रीपासूनच शहरातील बाजारपेठांमध्ये खरेदीची लगबग सुरू होती. मात्र, बाप्पाच्या प्रतिष्ठापनेच्या दिवशीही अनेक नागरिकांनी आवश्यक साहित्याची शेवटच्या क्षणी खरेदी केली. त्यामुळे सकाळपासून सायंकाळपर्यंत बाजारपेठांमध्ये मोठी गर्दी होती.

घरगुती गणपतीसाठी एखादी छोटी वस्तू राहून गेली असो किंवा मंडळाच्या सजावटीसाठी आवश्यक साहित्य घ्यायचे असो, प्रत्येकजण आपापल्या यादीतील वस्तू घेण्यासाठी धावपळ करताना दिसला. त्यामुळे बाजारपेठांमध्ये दिवसभर उत्साहाचे आणि गजबजलेले वातावरण होते.

Pune District : मुंबईला जाण्यासाठी नियोजनावर चर्चा; कुंजीरवाडीत मराठा समाजाची बैठक