Margaret Alva : दिल्लीतील इंडिया एआय इम्पॅक्ट समिटमध्ये भारतीय युवा काँग्रेसच्या कार्यकर्त्यांनी केलेल्या शर्टलेस निदर्शनांवरून आता काँग्रेसमध्येच दोन गट पडल्याचे दिसत आहे. काँग्रेसच्या ज्येष्ठ नेत्या आणि माजी केंद्रीय मंत्री मार्गारेट अल्वा (Margaret Alva) यांनी या कृत्यावर नाराजी व्यक्त करत, आंतरराष्ट्रीय कार्यक्रमांमध्ये प्रतिष्ठा, शिस्त आणि जबाबदारीची भावना जपली पाहिजे, असे स्पष्ट मत मांडले आहे. आपल्या विधानावरून वाद निर्माण झाल्यानंतर मार्गारेट अल्वा (Margaret Alva) यांनी आपला अधिकृत सोशल मिडिया अकाउंटवरुन आपली भूमिका स्पष्ट केली. त्यांनी पोस्टमध्ये म्हटले की, भाजप किंवा आरएसएसप्रमाणे काँग्रेसमध्ये एकाधिकारशाही नाही. आमचा पक्ष विविध दृष्टिकोन आणि सकारात्मक टीकेचे स्वागत करतो. एआय परिषदेतील निदर्शनांबद्दलचे माझे विचार वैयक्तिक आहेत. यामुळे काँग्रेस पक्ष आणि विचारसरणीबद्दलची माझी बांधिलकी तसूभरही कमी होत नाही. माझ्या वैयक्तिक मताचे राजकीय नाटकात रूपांतर करणाऱ्या लोकांपासून सावध राहा, असा टोलाही त्यांनी लगावला.
