Marathi School: मराठी शाळांमधील विद्यार्थ्यांची घटती पटसंख्या टिकवणे आणि ती वाढवणे हे सध्या शिक्षकांसमोरील मोठे आव्हान बनले आहे. पालकांचा वाढता कल इंग्रजी माध्यमाच्या शाळांकडे असल्याने मराठी शाळांना स्पर्धेचा सामना करावा लागत आहे. याच पार्श्वभूमीवर मंत्री गुलाबराव पाटील यांनी शिक्षकांना मराठी शाळांची पटसंख्या वाढवण्यासाठी विशेष प्रयत्न करण्याचे आवाहन केले. यावेळी त्यांनी शिक्षकांना काही अनोखे सल्लेही दिले.

साने गुरुजींचा दाखला देत गुलाबराव पाटील म्हणाले की, खरा शिक्षक हा विद्यार्थ्यांना केवळ शिक्षण देत नाही, तर त्यांच्यावर संस्कारही करतो. आपल्या आयुष्यातील शिक्षकांनी अभ्यासापेक्षा आपल्यातील वक्तृत्वाचा गुण ओळखला आणि त्याला प्रोत्साहन दिले. याच गुणाचा पुढे राजकीय जीवनातही आपल्याला फायदा झाल्याचे त्यांनी सांगितले. ( Marathi School)

मोबाईलच्या वाढत्या वापराबाबतही पाटील यांनी मिश्कील टिप्पणी केली. आपण मोबाईलचा वापर केवळ फोन करण्यासाठी आणि फोन घेण्यासाठीच करतो, असे सांगत त्यांनी उपस्थितांमध्ये हास्याची लकेर उमटवली.  (Marathi School)

शिक्षकांच्या ड्रेसकोडबाबतही त्यांनी महत्त्वाचे मत मांडले. शिक्षकांनी शाळेत ठरावीक ड्रेसकोडचे पालन करावे, जेणेकरून विद्यार्थी आणि पालकांना समोरची व्यक्ती शिक्षक असल्याचे सहज ओळखता येईल, असे ते म्हणाले.

‘हम दो हमारे दो आणि इंग्लिशमध्ये जाण्याचा’ बदलता ट्रेंड सांगत गुलाबराव पाटील यांनी मराठी शाळांची पटसंख्या टिकवणे हे मोठे आव्हान असल्याचे स्पष्ट केले. इंग्रजी माध्यमाकडे पालकांचा वाढता कल रोखण्यासाठी मराठी शाळांमध्येच दर्जेदार इंग्रजी शिक्षण देण्याची गरज असल्याचे त्यांनी सांगितले.

मराठी शाळांमधील विद्यार्थ्यांना चांगल्या दर्जाचे इंग्रजी शिक्षण मिळावे, यासाठी सीबीएसई पॅटर्नसह विविध उपक्रम राबवले जात असल्याची माहितीही त्यांनी दिली. मराठी शाळांची गुणवत्ता आणि विद्यार्थ्यांची संख्या वाढवण्यासाठी शिक्षक, पालक आणि प्रशासनाने एकत्रितपणे प्रयत्न करण्याची गरज असल्याचे पाटील यांनी अधोरेखित केले.