Mantralaya : मंत्रालयातील प्रशासकीय कामकाज अधिक सुरळीत होण्यासाठी राज्य सरकारने सहसचिव, उपसचिव आणि अवर सचिव या गट-अ संवर्गातील मंजूर पदांची संख्या वाढवली आहे. सप्टेंबर २०२६ अखेरच्या आकडेवारीनुसार, सहसचिवांची १८३, उपसचिवांची ११९ आणि अवर सचिवांची २९० पदे मंजूर करण्यात आली आहेत.

मंत्रालयातील प्रत्येक विभागाची पदसंख्या स्वतंत्रपणे निश्चित केली जाते. मात्र, या तीन संवर्गांतील एकूण मंजूर पदांची संख्या यापूर्वी एकत्रितपणे निश्चित करण्यात आली नव्हती. त्यामुळे पदोन्नती प्रक्रिया राबवताना उपलब्ध पदांचा एकत्रित विचार करण्यात अडचणी येण्याची शक्यता होती. ही अडचण दूर करण्यासाठी सरकारने तिन्ही संवर्गांतील मंजूर पदांची एकत्रित संख्या निश्चित करण्याचा निर्णय घेतला आहे.

सरकारने निश्चित केलेल्या आकडेवारीनुसार, १ जानेवारी २०२६ रोजी मंत्रालयात सहसचिवांची १८१ पदे मंजूर होती. त्यापैकी पाच पदे भारतीय प्रशासकीय सेवा (भाप्रसे) अधिकाऱ्यांसाठी राखीव होती. त्यामुळे मंत्रालयीन संवर्गासाठी १७६ पदे उपलब्ध होती. सप्टेंबरअखेर मंजूर पदांची संख्या १८३ झाली असून, भाप्रसेसाठी पाच पदे राखीव ठेवल्यानंतर मंत्रालयीन संवर्गासाठी १७८ पदे उपलब्ध झाली आहेत.

उपसचिव संवर्गातील मंजूर पदांमध्येही दोनने वाढ झाली आहे. जानेवारीमध्ये ११७ पदे असताना सप्टेंबरअखेर ही संख्या ११९ झाली. तर अवर सचिव संवर्गात सर्वाधिक ११ पदांची वाढ झाली आहे. जानेवारीमध्ये २७९ पदे मंजूर होती. सप्टेंबरअखेर ती वाढून २९० झाली आहेत.