Manish Sisodia : मद्य धोरण घोटाळा प्रकरणी अटकेत असणारे दिल्लीचे उपमुख्यमंत्री मनीष सिसोदिया हे आपल्या आजारी पत्नीला भेटण्यासाठी शासकीय निवासस्थानी दाखल झाले आहेत. राऊस एव्हेन्यू कोर्टाच्या आदेशानंतर मनीष शिसोदिया यांना घेऊन दिल्ली पोलिस निवासस्थानी पोहचले आहेत. मनीष सिसोदिया तुरुंगात जाईपर्यंत हे सरकारी घर त्यांना देण्यात आले होते. आता हे अधिकृतपणे केजरीवाल सरकारमधील शिक्षणमंत्री आतिशी यांच्याकडे सोपवण्यात आले आहे.

मनीष सिसोदिया कथित मद्य धोरण घोटाळा प्रकरणी तिहार तुरुंगात कैद आहेत.दरम्यान, सिसोदिया याना कोर्टाने सकाळी 10 ते दुपारी 4 या सहा तासांसाठी पत्नीला भेटण्याची परवानगी दिली आहे. मनीष सिसोदिया सकाळी दहाच्या सुमारास दिल्ली पोलिसांच्या वाहनातून मथुरा रोडवरील केजरीवाल सरकारमधील अतिशी यांच्या निवासस्थानी पोहोचले. त्याच्यासोबत पोलिसही आहेत.

न्यायालयाने मनीष सिसोदिया यांना त्यांच्या पत्नीला भेटण्याची परवानगी देताना त्यांना माध्यमांशी बोलू नये किंवा कोणत्याही राजकीय कार्यात सहभागी होऊ नये, असे आदेश दिले आहेत. आम आदमी पक्षाचे ज्येष्ठ नेते मनीष सिसोदिया यांना सीबीआयने फेब्रुवारी महिन्यात अटक केली होती. यापूर्वी ते अरविंद केजरीवाल सरकारमध्ये उपमुख्यमंत्री होते. त्यांच्याकडे इतरही अनेक विभाग होते. अलीकडेच उच्च न्यायालयाने मनीष सिसोदिया यांचा जामीन अर्ज फेटाळला होता.

दरम्यान, यापूर्वी जूनमध्ये दिल्ली उच्च न्यायालयाने मनीष सिसोदिया यांना त्यांची पत्नी सीमा यांना भेटण्याची परवानगी दिली होती, मात्र सीमा यांची प्रकृती अचानक बिघडल्याने त्यांना रुग्णालयात दाखल करण्यात आल्याने ते त्यांना भेटू शकले नाहीत. सिसोदिया यांच्या पत्नी ‘मल्टिपल स्क्लेरोसिस’ने त्रस्त आहेत. त्यांचीच भेट घेण्यासाठी आज सिसोदिया निवासस्थानी दाखल झाले आहेत.