Mandhardev Ghat- मांढरदेवला वाई व भोर या दोन्ही बाजूंनी येणाऱ्या दोन्ही घाटांतील रस्त्याचे काम रखडले आहे. अपूर्ण कामामुळे या दोन्ही घाटातील रस्ते अपघाताला निमंत्रण देत असल्यासारखी स्थिती आहे. या रस्त्यांकडे संबंधित खाते व प्रशासनाच्या दुर्लक्षामुळे प्रवाशांच्या जीवाशी खेळ सुरु असून या खेळात मोठा अपघात जाल्यास जबाबदार कोण असा प्रश्‍न लोक विचारु लागले आहेत.

लाखो भाविकांचे श्रद्धास्थान असलेल्या मांढरदेवला वाई व भोर या दोन्ही मार्गे घाटरस्त्याने यावे लागले. या दोन्ही घाटांचे रुंदीकरण व काँक्रिटीकरण मागील वर्षी करण्यात आले आहे. परंतु, या दोन्ही घाटामध्ये दोन ते तीन किलोमीटरचे रुंदीकरणाचे व काँक्रिटीकरणाचे काम बंद असून भोर घाट हद्दीमध्ये १०२/९८० ते ९८० ते १०५/४५० या लांबीच्या अंतरात वन विभागाने काम करण्यास परवानगी दिली नसल्यामुळे या ठिकाणी काम अपूर्ण आहे.

या अपूर्ण काम असलेल्या ठिकाणावरील रस्ता वाहतूकीसाठी एवढा प्रचंड खराब झाला आहे. तिथून गाडी चालवताना वाहन चालकांना अक्षरशः तारेवरची कसरत करावी लागत आहे. एका ठिकाणी रस्त्या तुटून गेला आहे. आणि अशा परिस्थितीत जर मोठ्या अपघात झाला तर प्रवाशांच्या जीवाला धोका होण्याची शक्यता नाकारता येत नाही.

त्यामुळे या रस्त्याचे काम पूर्ण करण्यासाठी प्रयत्न केले जाणार आहेत की संबंधित विभाग व प्रशासन लोकांचे जीव जाण्याची वाट पाहत आहे, हाच मोठा प्रश्न जनतेला पडलेला आहे. त्यामुळे जनतेच्या सहनशक्तीचा अंत न पाहता यावर लवकरात लवकर निर्णय घेऊन या रस्त्याचे काम लगेच पूर्ण करून घ्यावे, अन्यथा यासाठी रस्त्यावर उतरुन आंदोलन करण्याची तयारी लोकांमध्ये सुरु आहे.