Cockroach Janata Party : शिक्षण आणि पर्यावरण तज्ञ सोनम वांगचुक यांनी रविवारी दिल्लीतील जंतर-मंतर परिसरात बेमुदत उपोषण सुरू केले. त्यामुळे कॉक्रोच जनता पार्टीच्या (सीजेपी) आंदोलनाची तीव्रता वाढण्याची चिन्हे आहेत.

नीट आणि इतर परीक्षांच्या गोंधळाबद्दल केंद्रीय शिक्षण मंत्री धर्मेंद्र प्रधान यांनी राजीनामा द्यावा, अशी मागणी सीजेपीने लावून धरली आहे. त्यासाठी सीजेपीचा संस्थापक अभिजीत दिपके आणि इतर सदस्यांनी जंतर-मंतर परिसरात २० जूनपासून ठिय्या दिला आहे.

त्यांना साथ देण्यासाठी आंदोलनाच्या नवव्या दिवशी वांगचुक मैदानात उतरले. त्यांनी उपोषणाला प्रारंभ करण्याआधी दिपके समवेत राजघाटावर जाऊन महात्मा गांधी यांच्या स्मृतींना अभिवादन केले.

वांगचुक यांनी उपोषण सुरू केले तेव्हा जंतर-मंतर परिसरात शेकडों तरूण, विद्यार्थी उपस्थित होते. काही शेतकरी नेतेही आवर्जून आंदोलनस्थळी दाखल झाले.

वांगचुक यांनी उपोषण करण्यामागची भूमिका स्पष्ट केली. आधीपासून लडाखमधील आंदोलनात सहभागी असताना सीजेपीला साथ देण्याविषयी लोक मला विचारतात. जवळपास ४० वर्षांपासून माझ्यादृष्टीने शिक्षण हा अतिशय महत्वाचा मुद्दा आहे.

शिक्षणव्यवस्थेशी निगडीत मुद्द्यांवरून युवक आवाज उठवत असताना मी स्वस्थ कसा बसू शकतो? त्यांना मी पाठिंबा देणे अतिशय स्वाभाविक आहे. मुलांचे आयुष्य घडवण्यासाठी आणि देशाला दिशा देण्यासाठी शिक्षणाचा उपयोग करण्यावर फोकस असायला हवा.

लडाखचा विचार करता हिमालयाचे रक्षण ही सर्वांचीच जबाबदारी आहे. कारण, त्या विभागातून उगम पावणाऱ्या पाण्यावर मोठ्या संख्येने लोक अवलंबून आहेत. सरकारने संवेदनशीलता दाखवली असती तर आम्हाला येथे ठिय्या देण्याची गरज भासली नसती.

उत्तरदायित्वाचा अभाव असल्याने लोकशाहीत शांततापूर्ण आंदोलन हा एकमेव पर्याय उपलब्ध आहे. त्याच पर्यायाचा अवलंब आम्ही करत आहोत, असे ते म्हणाले.