Manchar News – शेवाळवाडी (ता.आंबेगाव) येथील ४५ वर्षीय शेतकरी सुधाकर दत्तात्रय थोरात यांना शेतात काम करताना अचानक तीव्र छातीत दुखणे,घाम येणे आणि चक्कर येण्याचा त्रास झाला.मंचर उपजिल्हा रुग्णालयात दाखल केल्यानंतर तपासणीत तीव्र हृदयविकाराचा झटका आल्याचे स्पष्ट झाले.डॉक्टरांनी तातडीने केलेल्या उपचारामुळे त्यांची प्रकृती स्थिर झाली.

एकंदर वेळेत उपचार मिळाल्याने हृदयविकाराच्या झटक्यातून शेतकऱ्याला जीवदान मिळाले आहे. सुधाकर दत्तात्रय थोरात शेतात काम करताना त्रास सुरू झाल्यानंतर थोरात घरी गेले. काही वेळ विश्रांती घेतल्यानंतरही छातीतील वेदना वाढत असल्याने कुटुंबीयांनी त्यांना तातडीने मंचर उपजिल्हा रुग्णालयात आणले.त्यावेळी हृदयाची गती आणि रक्तदाब कमी झाल्याचे निदर्शनास आले.

वैद्यकीय अधिकारी डॉ. अर्जुन दिघे व डॉ.रामप्रसाद धायकर यांनी तातडीने हृदयरोगतज्ज्ञ डॉ.सदानंद राऊत यांच्याशी संपर्क साधला. ईसीजी व रक्त तपासण्यांच्या आधारे हृदयविकाराचे निदान झाल्यानंतर नातेवाईकांची संमती घेऊन अतिदक्षता विभागात रक्तातील गुठळी विरघळविणारे इंजेक्शन देण्यात आले. उपचारादरम्यान नियमित ईसीजी, रक्तदाब, नाडी व प्राणवायूचे प्रमाण तपासण्यात आले.

उपचारानंतर छातीतील दुखणे थांबले व रक्तदाब सामान्य झाला. डॉ. अर्जुन दिघे,डॉ.रामप्रसाद धायकर डॉ.प्रवीण देशमुख, डॉ. चेतन भागवत,निखिल कालपुंड व योगेश वाडेकर यांनी उपचार केले. पुढील उपचारांसाठी १०८ रुग्णवाहिकेने त्यांना यशवंतराव चव्हाण रुग्णालयात दाखल करण्यात आले. मंचर उपजिल्हा रुग्णालयाचे १०८ मेडिकल ऑफिसर डॉ. संतोष शिंदे व चालक महेश वालकोळी यांनी रुग्णाला सुरक्षितपणे पुणे येथे नेले.उपचारानंतर छातीतील वेदना कमी होऊन रक्तदाब सामान्य झाला.

“थ्रॉम्बोलिसिस युनिट सुरू झाल्यापासून मंचर उपजिल्हा रुग्णालयात आतापर्यंत तीन हृदयविकाराच्या रुग्णांवर तातडीने यशस्वी उपचार झाले आहेत. त्यामुळे ग्रामीण भागातील रुग्णांना मोठा फायदा होत आहे.”
– डॉ. शिवाजीराव जाधव,वैद्यकीय अधीक्षक, उपजिल्हा रुग्णालय मंचर.