Manchar News – मंचर नगरपंचायतीच्या कार्यालयात अधिकारी व कर्मचाऱ्यांच्या उपस्थितीबाबत गंभीर त्रुटी आढळल्याची घटना समोर आली आहे. राजगुरुनगर नगरपंचायतीचे मुख्याधिकारी अंबादास गरकळ यांच्याकडे सध्या मंचरचा अतिरिक्त कार्यभार असून त्यांनी सोमवारी (ता. २) सायंकाळी अचानक कार्यालयाला भेट देत उपस्थितीची पडताळणी केली. त्यामध्ये अनेक अधिकारी आणि कर्मचारी अनुपस्थित असल्याचे जाणवल्याने त्यांनी दांडी बहादरांना फैलावर घेतले. या तपासणीत काही अधिकारी व कर्मचारी कार्यालयात अनुपस्थित असल्याचे आढळून आले. उपस्थिती नोंदवही तपासली असता काही जणांनी हजेरीपत्रकावर स्वाक्षरी केलेली नसल्याचे तसेच अनुपस्थितीसंदर्भात कोणताही रजेचा अर्ज सादर न केल्याचे स्पष्ट झाले. हा प्रकार उपनगराध्यक्ष लक्ष्मण थोरात यांच्या उपस्थितीत निदर्शनास आला. संबंधित नोंदींसमोर ‘गैरहजर’ असा शेरा मारत पुढील काळात पूर्वपरवानगी व लेखी रजेचा अर्ज अनिवार्य राहील, असे गरकळ यांनी स्पष्ट केले. मुख्याधिकारीच दीर्घ रजेवर दरम्यान, नगराध्यक्ष राजश्री गांजाळे व उपनगराध्यक्ष लक्ष्मण थोरात यांच्या निवडीनंतर मुख्याधिकारी गोविंद जाधव दीर्घ रजेवर गेले आहेत. अतिरिक्त कार्यभारामुळे कार्यालयीन कामकाजात शिथिलता आल्याची चर्चा सुरू होती. अचानक पाहणीमुळे प्रशासनात शिस्त निर्माण होईल, अशी अपेक्षा व्यक्त केली जात आहे.
