Manchar News – सन २०२६-२७ या आर्थिक वर्षासाठी मंचर नगरपंचायतीचे एकूण अंदाजपत्रक अंदाजे २१५ कोटी इतके प्रस्तावित करण्यात आले आहे.अशी माहिती नगराध्यक्षा राजश्री गांजाळे,उपनगराध्यक्ष लक्ष्मण थोरात यांनी दिली. सन २०२६-२७ या आर्थिक वर्षासाठीचा अर्थसंकल्प मंजूर करण्यासाठी मंचर नगरपंचायतीची सर्वसाधारण सभा पार पडली. सभेचे अध्यक्षस्थान मंचर नगरपंचायतीच्या प्रथम नगराध्यक्षा राजश्री दत्तात्रय गांजाळे यांनी स्वीकारले. यावेळी उपनगराध्यक्ष लक्ष्मण थोरात, मुख्याधिकारी अंबादास गर्कळ, कार्यालय अधीक्षक वरद थोरात, लेखाधिकारी महेश पाचोरे, बांधकाम अभियंता संदीप पवार, कर व प्रशासकीय अधिकारी मनोज सरदार तसेच मान्यवर सदस्य उपस्थित होते. सभेच्या प्रारंभी लेखाधिकारी महेश पाचोरे यांनी उपस्थितांचे स्वागत करून मुख्याधिकारी अंबादास गर्कळ यांच्या मार्गदर्शनाखाली तयार करण्यात आलेल्या अर्थसंकल्पाचे वाचन केले.अर्थसंकल्पावर सखोल चर्चा झाली. सदस्यांनी सुचविलेल्या काही महत्त्वपूर्ण सूचनांचा विचार करून अंदाजपत्रकात आवश्यक ते बदल करण्यात आले. त्यानंतर सर्वसाधारण सभेने अर्थसंकल्पास एकमताने मंजुरी दिली. सन २०२६-२७ या आर्थिक वर्षासाठी नगरपंचायतीचे एकूण अंदाजपत्रक अंदाजे २१५ कोटी इतके प्रस्तावित करण्यात आले आहे. नगरपालिकेच्या सर्वांगीण विकासाचा विचार करून हा अर्थसंकल्प तयार करण्यात आला असून नागरिकांना अधिक दर्जेदार व मूलभूत सुविधा उपलब्ध करून देणे हा मुख्य उद्देश आहे. उत्पन्नवाढीवर विशेष भर देत मालमत्ता कर वसुली, पाणीपट्टी वसुली तसेच शासनाकडून मिळणाऱ्या अनुदानात वाढ अपेक्षित असल्याचे नमूद करण्यात आले. विकासकामांना प्राधान्य खर्चाच्या बाबतीत पिण्याच्या पाण्याच्या योजना बळकट करणे, सिमेंट काँक्रीट रस्ते व गटार विकास, महिला व बालकल्याण, दिव्यांग कल्याण, आर्थिक दुर्बल घटकांसाठी तरतूद, स्वच्छता व घनकचरा व्यवस्थापन सुधारणा, पथदिवे व ऊर्जा बचत योजना, शहर सुशोभीकरण, हरित उपक्रम तसेच आरोग्य व सार्वजनिक सुविधा सुधारणा यांस प्राधान्य देण्यात आले आहे. नगरपालिकेची आर्थिक शिस्त राखून उपलब्ध निधीचा योग्य वापर करत नागरिकाभिमुख विकासकामे राबविण्याचा निर्धार यावेळी व्यक्त करण्यात आला. अर्थसंकल्प नागरिकांना पाहण्यासाठी नगरपंचायत कार्यालयात उपलब्ध राहणार आहे.सभेच्या शेवटी लेखाधिकारी महेश पाचोरे यांनी उपस्थितांचे आभार मानले. नगराध्यक्षा राजश्री गांजाळे व उपनगराध्यक्ष लक्ष्मण थोरात यांनी हा अर्थसंकल्प मंचरच्या सर्वांगीण विकासासाठी महत्त्वपूर्ण ठरेल, असा विश्वास व्यक्त केला.
