Manchar Fire Accident – मंचर शहरातील मध्यवर्ती वस्तीत एका बंद सदनिकेला आग लागून घरातील संसारोपयोगी वस्तू, फर्निचर, रोख रक्कम व सोन्याचे दागिने अशा सुमारे अंदाजे साडेतीन लाख रुपयांच्या ऐवज जाळून खाक झाला. ही घटना शुक्रवार, दि.१३ रोजी घडली. महसूल आणि पोलीस विभागाने पंचनामा केला आहे.या आगीत संपूर्ण घरातील साहित्य जळून खाक झाले असून संबंधित कुटुंबावर मोठे आर्थिक संकट ओढवले आहे. पारगाव येथील दत्तात्रय वळसे पाटील महाविद्यालयाच्या शिक्षिका मोनिका थोरात व त्यांचे पती अरुण थोरात कामानिमित्त पुण्याला गेले असताना त्यांच्या फ्लॅटमधून अचानक धूर निघू लागला. तसेच काचा फुटून रस्त्यावर पडत असल्याचे पाहून आजूबाजूच्या रहिवाशांनी धाव घेत मदतीचा प्रयत्न केला. मात्र, फ्लॅट बंद असल्याने सुरुवातीला आत प्रवेश करणे शक्य झाले नाही. हा प्रकार मोनिका थोरात यांना कळविल्यानंतर त्यांनी या घटनेची माहिती शेजारी राहणाऱ्या रहिवाश्यांना दिली. त्यानंतर रहिवाशांनी दरवाजा तोडून आत प्रवेश केला असता आगीने रौद्र रूप धारण केले होते. नागरिकांनी आगीवर नियंत्रण मिळवण्याचा प्रयत्न केला. तोपर्यंत घरातील सर्व वस्तू जळून खाक झाल्या होत्या. काही महिन्यांपूर्वीच दिवाळीच्या सुमारास सदनिकेचा ताबा घेऊन वास्तुशांती व सत्यनारायणाची पूजा करण्यात आली होती. घरासाठी शरद बँकेकडून कर्जही घेण्यात आले होते. मात्र, अचानक घडलेल्या या घटनेमुळे थोरात कुटुंबावर मोठे संकट ओढवले आहे. मंचर पोलिसांनीही घटनास्थळी जाऊन पंचनामा केला असून शॉर्टसर्किटमुळे आग लागल्याचा प्राथमिक अंदाज व्यक्त करण्यात आला आहे. घटनेची माहिती मिळताच आंबेगाव तालुक्याचे तहसीलदार डॉ.सचिन वाघ,ग्राम महसूल अधिकारी रवींद्र कदम,महसूल सेवक संदीप पडवळ यांनी घटनास्थळी भेट देऊन पाहणी करत पंचनामा केला.
