न्हावरे : शिरुर तालुक्याच्या पुर्व भागातील गुनाट गावात सामाईक वापरातील इलेक्ट्रिक मोटारच्या वादातून सख्ख्या भावासह वहिनीने शेतकऱ्याला मारहाण केल्याची घटना घडली आहे. या प्रकरणी शिरुर पोलीस ठाण्यात गुन्हा दाखल करण्यात आला आहे.

शिरुर पोलिसांनी दिलेल्या माहितीनुसार, संदीप कारभारी कोळपे (वय ३८, रा. गुनाट, ता. शिरुर, जि.पुणे) यांनी याबाबत फिर्याद दिली असुन ७ जून २०२६ रोजी सकाळी १० च्या सुमारास फिर्यादी संदीप कोळपे घरी असताना त्यांचे मोठे भाऊ भाऊसाहेब कारभारी कोळपे व वहिनी सोनाली भाऊसाहेब कोळपे हे घरासमोर आले.

यावेळी सामाईक वापरातील इलेक्ट्रिक मोटार घरी का आणली, याबाबत दोन्ही बाजूंमध्ये वाद झाला. फिर्यादीनुसार, मोटार कोणालाही वापरु देणार नसल्याचे सांगितल्याने आरोपी संतापले. त्यानंतर त्यांनी शिवीगाळ व दमदाटी करत संदीप कोळपे यांना खाली पाडले व लाथाबुक्क्यांनी मारहाण केली.  (Crime News)

याच दरम्यान आरोपींनी दगड डोक्यात घालत दुखापत केल्याचा आरोप फिर्यादीने केला आहे. तसेच जीवे मारण्याची धमकी दिल्याचेही फिर्यादीत नमूद करण्यात आले आहे. या घटनेनंतर जखमी संदीप कोळपे यांनी शिरुर पोलीस ठाण्यात धाव घेत तक्रार दाखल केली. त्यानुसार भाऊसाहेब कारभारी कोळपे आणि सोनाली भाऊसाहेब कोळपे यांच्याविरुद्ध गुन्हा दाखल करण्यात आला असून पुढील तपास पोलीस हवालदार प्रताप टेंगले करीत आहेत.

हेही वाचा : Amin Haji : लगानने माझं करिअर उद्ध्वस्त केलं; 25 वर्षानंतर ‘या’ अभिनेत्याचा धक्कादायक खुलासा