Mamata Sindhutai Sapkal : मराठी रंगभूमी आणि छोट्या पडद्यावर विविधांगी भूमिका साकारणाऱ्या ज्येष्ठ अभिनेत्री ज्योती चांदेकर यांच्या निधनानंतर संपूर्ण मराठी कलाविश्वात शोककळा पसरली आहे. ५३ वर्षांच्या अभिनय कारकिर्दीत त्यांनी असंख्य नाटके, मालिका आणि चित्रपटांत काम करत प्रेक्षकांची मनं जिंकली. ‘मी सिंधुताई सपकाळ’ या चित्रपटातील त्यांच्या अभिनयाने तर प्रेक्षकांच्या मनात वेगळं स्थान निर्माण केलं.

२०१० साली प्रदर्शित झालेल्या या चित्रपटादरम्यान, त्यांनी सिंधुताई सपकाळ यांची भूमिका साकारली होती. या वेळी त्यांच्या सोबतच मुलगी व अभिनेत्री तेजस्विनी पंडित हिनेही महत्त्वाची भूमिका केली होती. त्यामुळे या चित्रपटाचं त्यांच्यासाठी भावनिक नातं जुळलेलं होतं.

दरम्यान, सिंधुताई सपकाळ यांच्या कन्या ममता सिंधुताई सपकाळ यांनी सोशल मीडियावर एक भावनिक पोस्ट लिहित ज्योती चांदेकरांना श्रद्धांजली अर्पण केली आहे.

 

ममता सपकाळ यांची पोस्ट

त्यांनी लिहिलं,
“प्रिय ज्योती ताई,
असं अचानक तुमचं पुढच्या प्रवासाला निघून जाणं मला अजिबात पचवता येत नाही. काल तुमचं शेवटचं दर्शन घेताना २००९ मध्ये तुम्ही माईंना भेटायला आलात, तो क्षण आठवत होता. तुम्ही माईंच्या प्रत्येक हालचाली, प्रत्येक ढब टिपून घेत होतात आणि नंतर ‘मी सिंधुताई सपकाळ’मध्ये तशीच माई उभी केलीत.
काल तेजुला पाहताना मला तुम्हीच दिसत होता. तिचे वाहणारे डोळे, तिने फोडलेला हंबरडा… हे सर्व मी अनुभवले आणि मला स्वतःचं दुःख आठवलं.
ताई, जन्म नश्वर आहे हे माहीत आहे, पण इतकी घाई का केलीत हा प्रश्न मात्र कायम राहील. जिथे असाल तिथे आनंदात असा. माईंची भेट झाली तर सांगा, ममता ठीक आहे. तुमचा वसा आणि वारसा जबाबदारीने सांभाळते आहे.”

प्रेक्षकांचा लाडकी ‘पूर्णा आजी’

ज्योती चांदेकर गेल्या दोन वर्षांपासून स्टार प्रवाहवरील ‘ठरलं तर मग’ या मालिकेत पूर्णा आजीची भूमिका साकारत होत्या. त्यांच्या निधनाने मालिकेतील सहकलाकारांसह असंख्य चाहते हळहळ व्यक्त करत आहेत.

अखेरचा प्रवास

ज्योती चांदेकर यांनी पुण्यात वयाच्या ६९ व्या वर्षी अखेरचा श्वास घेतला. त्यांच्या पश्चात दोन मुली पौर्णिमा व अभिनेत्री तेजस्विनी पंडित असा परिवार आहे.