Purna Ajji Replacement :  ठरलं तर मग! या स्टार प्रवाह या वाहिनीवर गाजत असलेल्या लोकप्रिय मालिकेने नुकताच ९०० एपिसोडचा टप्पा पूर्ण केला आहे. या मालिकाला प्रेक्षकांचे भरभरून प्रेम मिळत आहे. काही दिवसांपूर्वीच या मालिकेत पूर्णाआजीची भूमिका साकारणाऱ्या ज्येष्ठ अभिनेत्री ज्योती चांदेकर यांचं निधन झालं. त्यांच्या निधनाने सर्वांनाचा मोठा धक्का बसला. त्यांची मालिकेमधून अकाली एक्झिट सर्वांना चटका लावणारी आहे.

यामुळे पूर्णा आजीची व्यक्तीरेखा कोण साकारणार याविषयी चर्चा सुरू आहे. या मालिकेच्या निर्मात्या सुचित्रा बांदेकर यांनी आम्ही अजून त्या दुःखातून बाहेर पडलेलो नाही. यामुळे सध्या तरी आम्ही या पात्राबाबत विचार केला नाही. पण भूमिकेसाठी नवीन पात्र शोधावेच लागणार असल्याचं स्पष्ट केलं होतं. आता सोशल मीडियावर पूर्णा आजीच्या भूमिकेसाठी वेगवेगळी नावे समोर येत आहेत.

ज्येष्ठ अभिनेत्री ज्योती चांदेकर यांच्या अकाली एक्झिटने या मालिकेच्या संपूर्ण टीमवर दुःखाचा डोंगर कोसळला. मालिकेतील काही कलाकारांनी ज्योती चांदेकर यांच्याविषयी पोस्ट शेअर करत त्यांच्यासोबतच्या आठवणींना उजाळा दिला. मालिकेच्या निर्मात्या सुचित्रा बांदेकर या देखील भावूक झाल्याचं पाहायला मिळालं.

सोशल मीडियावर पूर्णा आजीच्या भूमिकेसाठी रोहिणी हट्टंगडी, सुहास परांजपे यांसारख्या अभिनेत्रींची नावे चर्चेत आहेत. आता यामध्ये आणखी एक नाव समोर आलं आहे. या अभिनेत्रीचं नाव आहे स्वाती चिटणीस. त्या शेवटच्या स्टार प्रवाह या वाहिनीवरील तू ही रे माझा मितवा या मालिकेत दिसल्या. त्यांनी या मालिकेत आजीची व्यक्तीरेखा साकारलेली होती. त्यांनी ही मालिका नुकतीच सोडली असल्याचं समोर आलं आहे.

त्यामुळे या अभिनेत्रीची ठरलं तर मग मालिकेत एन्ट्री होऊ शकते असा अंदाज व्यक्त करण्यात आला आहे. स्वाती चिटणीस या सुद्धा पूर्णा आजीच्या पात्राला न्याय देऊ शकतात असा विश्वास अनेकांनी वर्तवला आहे. त्यामुळे चर्चेत असलेल्या या अभिनेत्रींपैकी पूर्णा आजीच्या भूमिका साकारण्याची संधी कुणाला मिळणार हे पाहणं उत्सुकतेचे असणार आहे.

हेही वाचा :  पुण्यातील गणपती विसर्जन मिरवणूक यंदाही रेंगाळली; २४ तास उलटूनही मिरवणुका सुरूच…