महाबळेश्वर – महाबळेश्वर तालुक्यातील सर्व विभागांनी विकासकामांसाठी परस्परांमध्ये समन्वय राखून गती द्या. एकमेकांच्या कामात अडथळे आणणे बंद करा, अशी तंबी हिरडा विश्रामगृहावर आयोजित अधिकाऱ्यांच्या आढावा बैठकीत मदत व पुनर्वसन मंत्री ना. मकरंद पाटील यांनी दिली.

यावेळी तहसीलदार तेजस्विनी पाटील यांच्यासह विविध विभागांचे अधिकारी उपस्थित होते. महाबळेश्वर पालिका प्रशासक योगेश पाटील यांनी मुख्य बाजारपेठ सुशोभिकरण, पार्सनेज मार्केट इमारत तसेच पालिका इमारत प्रस्तावासह विकासकामांची माहिती दिली. ना. मकरंद पाटील यांनी बाजारपेठ सुशोभिकरण कामाबद्दल नाराजी व्यक्त करून व्यापाऱ्यांसमवेत चर्चा करून नवीन आराखड्याची कामास गती देण्याच्या सूचना प्रशासक पाटील यांना दिल्या.

पालिका इमारतीचे गेली काही वर्षे रखडलेले काम देखील पूर्ण करणे आवश्यक असल्याचे सांगून यासाठी युद्धपातळीवर प्रयत्न करणे आवश्यक असल्याचे पालिका प्रशासक पाटील यांना सांगितले. तसेच पार्सनेज मार्केटमधील वाहनतळ व शॉपिंग कॉम्प्लेक्स कामासाठी इमारत कामासाठी १५ कोटींचा निधी मंजूर झाला असून हें काम पालिकेने प्राधान्याने हाती घ्यावे, असे सांगितले. शहरातील विकास कामांच्या बाबत महत्वपूर्ण चर्चेमध्ये विशाल तोष्णीवाल, ॲड. संजय जंगम, अफझल सुतार, रवींद्र कुंभारदरे आदींनी आपली मते मांडली.

पाचगणी पालिकेच्या विकास कामांची सविस्तर माहिती पालिका मुख्याधिकारी निखिल जाधव यांनी दिली. यावेळी पाचगणीच्या दांडेघर टोल नाक्यावर महाबळेश्वरकडे येणाऱ्या पर्यटकांच्या लुटीकडे पदाधिकाऱ्यांनी लक्ष वेधले. याबाबत ना. पाटील यांनी प्रशासकांनी याकडे लक्ष देऊन लूट होणार नाही अशा पद्धतीने ठेकेदारास समज देण्याबाबत सांगितले.

सार्वजनिक बांधकाम विभागाचे उपअभियंता अजय देशपांडे यांनी तालुक्यात सुरु असलेल्या रस्ते कामांची माहिती दिली. ना. पाटील यांनी हॅम्पमधून होणाऱ्या कामाची देखील माहिती घेतली. महाबळेश्वर तालुक्यात देखील मेढा रस्त्याप्रमाणेच दर्जेदार कामे करण्यासाठी प्रयत्न करा, अशा सूचना अधिकाऱ्यांना दिल्या. महाबळेश्वरच्या वाहतूक कोंडीची समस्या पूर्णपणे सोडविण्यासाठी वेण्णा लेकच्या बाह्य वळण रस्त्याचे काम पूर्णत्वास जाणे आवश्यक असल्याचे ना. पाटील यांनी सांगून वन विभागाच्या अधिकाऱ्यांनी अशा महत्वपूर्ण कामांना विरोध करू नये, ज्या ठिकाणी अडचण नाही त्याठिकाणी या पुलाच्या कामास तातडीने सुरुवात करा, अशा सूचना बांधकाम विभागास दिल्या.

तहसीलदार तेजस्विनी पाटील यांनी महसूल विभागाच्या कामांचा आढावा दिला. तसेच महाबळेश्वरच्या प्रशासकीय इमारतीच्या कामांसाठी एक परवानगी आवश्यकता असल्याचे ना. पाटील यांच्या निदर्शनास आणून दिले. ना. पाटील यांनी आपण पुढील दोन दिवस मुंबई येथे याबाबतचा निर्णय घेऊ असे सांगितले.

या बैठकीत जिल्हा बँकेचे संचालक राजेंद्र राजपुरे यांनी महाबळेश्वर तालुक्यातील विकास कामे प्राधान्याने व्हावीत यासाठी ना. मकरंद पाटील यांनी तालुक्यात सर्वप्रथम अशा प्रकारे आढावा बैठकीचे आयोजन केले असल्याचे सांगून पर्यटन स्थळांसह तालुक्यातील दुर्गम भागातील प्रलंबित प्रश्न सोडविण्यासाठी अधिकाऱ्यांनी प्रस्ताव तातडीने सादर करावेत असे नमूद केलॆ

नियोजन मंडळ सदस्य प्रवीण भिलारे यांनी गावठाण क्षेत्राचा विस्तार करावा व स्थानिक ग्रामस्थांची घरे नियमित करण्यात यावीत, अशी मागणी केली. ग्रामपंचयातीने स्थानिक ग्रामस्थांच्या नोंदी करताना लागणारे प्रतिज्ञापत्र तहसील कार्यालयातून घ्यावे, तशा सूचना मंत्री ना. पाटील यांनी अधिकाऱ्यांना दिल्या. तसेच ग्रामपंचायती अनधिकृत बांधकाम म्हणून शेरा मारून उतारे देतात याबाबत आपण लक्ष घालावे, अशी विनंती देखील प्रवीण भिलारे यांनी केली.

किल्ले प्रतापगड विकास प्राधिकरणाचे सदस्य विजय नायडू यांनी किल्ले प्रतापगड येथे सवानी ठेकेदारामार्फत सुरु असलेल्या निकृष्ट दर्जाच्या कामांकडे लक्ष वेधले ही कामे थांबविण्याची विनंती केली. यासंदर्भात पुरातत्व विभागाच्या अधिकाऱ्यांसमवेत दूरध्वनी वरून कामांच्या दर्जाबाबत चर्चा केली. पंचायत समिती, महावितरण, एसटी, दूरसंचार विभाग, पाणीपुरवठा विभाग, जिल्हा परिषद व पोलीस प्रशासन यांच्या कामकाजाचा आढावा बैठकीत घेतला. या बैठकीस सहायक उपवनसंरक्षक प्रदीप रौंदळ, गटविकास अधिकारी यशवंत भांड, बांधकाम विभागाचे उपअभियंता अजय देशपांडे, महाबळेश्वरचे मुख्याधिकारी योगेश पाटील, पाचगणीचे मुख्याधिकारी निखिल जाधव, वनक्षेत्रपाल गणेश महांगडे, पोलीस निरीक्षक बापूसाहेब सांडभोर, महावितरणचे चेन्ना रेड्डी, आगार व्यवस्थापक महेश जाधव आदी अधिकारी उपस्थित होते.

या बैठकीस जिल्हा बँकेचे संचालक राजेंद्र राजपुरे, नियोजन मंडळ सदस्य प्रवीण भिलारे, बाबुराव संकपाळ यांच्यासह महाबळेश्वरचे माजी नगराध्यक्ष बबनराव ढेबे, विमलताई पार्टे, ॲड. संजय जंगम, संदीप साळुंके, विशाल तोष्णीवाल, अफझल सुतार, सुनील शिंदे, नासिर मुलाणी, रोहित ढेबे, शरद बावळेकर, दत्तात्रय वाडकर, रवींद्र कुंभारदरे, विजय नायडू, जीवन महाबळेश्वरकर, श्रद्धा रोकडे, सुरेखा देवकर, लता आरडे, तौफिक पटवेकर, अनिकेत रिंगे, सचिन ढेबे यांच्यासह क्षेत्र महाबळेश्वर, किल्ले प्रतापगडसह तापोळा भागातील पदाधिकारी, कार्यकर्ते उपस्थित होते.