अहमदाबाद – भारतीय संघाला आजवर लाभलेल्या सर्व कर्णधारांमध्ये महेंद्रसिंह धोनी सर्वश्रेष्ठ कर्णधार आहे. एखाद्या सामान्य खेळाडूला महान खेळाडू बनवण्याची हातोटी त्याच्याकडे आहे, अशा शब्दात ऑस्ट्रेलियाचा माजी कसोटी क्रिकेटपटू मॅथ्यु हेडन याने धोनीचे कौतुक केले आहे. भारतीय संघाचे नेतृत्व करत असतानाच नव्हे तर चेन्नई सुपर किंग्जचे कर्णधारपद सांभाळतानाही त्याने भविष्यात भारतीय संघासाठी अव्वल कामगिरी करू शकतील असे खेळाडू तयार केले आहेत. त्याने स्वतः जेव्हा निवृत्ती घेण्याचे मनात निश्चित केले होते तेव्हाच त्याने विराट कोहलीला तयार केले. आताही तो आयपीएल स्पर्धेतून निवृत्त होण्यापूर्वी त्याचा वारसदार तयार करून ठेवेल. त्याच्याकडे उद्याचे म्हणजेच भविष्याचे नियोजन असते व हा गुण खूप कमी कर्णधारांमध्ये पाहायला मिळतो, असेही हेडन म्हणाला. केवळ भारतीय संघाच्याच नव्हे तर चेन्नई सुपर किंग्जच्या यशात धोनीचा मोठा वाटा आहे. त्याच्या नेतृत्वाखाली संघाने चारवेळा विजेतेपद मिळवले. कोणत्याही संकटातून कसा मार्ग काढायचा किंवा एका सामान्य खेळाडूकडून सर्वोत्तम कामगिरी कशी करून घ्यायची यात तो हुशार आहे. त्याने स्वतःचे स्थान अन्य फलंदाजांना देत त्यांना जास्तीत जास्त संधी दिली आहे. असे त्याग करणारे कर्णधार पाठीशी असतील तर युवा गुणवत्ता निश्चितच उदयाला येते, असेही हेडन म्हणाला.
