Mahavatar Narsimha Oscar : २०२६ च्या ऑस्करमध्ये सर्वोत्कृष्ट ॲनिमेटेड फीचर फिल्मसाठी पात्र असलेल्या चित्रपटांची यादी जाहीर झाली आहे आणि “महावतार नरसिंह” हा भारतीय चित्रपट पात्र ठरला आहे. अकादमीने स्वतः एक अधिकृत अपडेट शेअर केला आहे ज्यामध्ये “महावतार नरसिंह” या श्रेणीतील अनेक चित्रपटांशी स्पर्धा करेल याची पुष्टी केली आहे. भारतासाठी ही अभिमानास्पद गोष्ट आहे. तसेच चित्रपटाची ३४ चित्रपटांमधून निवड करण्यात आली आहे, ही मोठी बाब आहे. महावतार नरसिंह २५ जुलै रोजी थिएटरमध्ये प्रदर्शित झाला होता. दिग्दर्शक अश्विन कुमार यांच्या ‘ महावतार नरसिंह’ या पौराणिक ॲनिमेटेड चित्रपटाने बॉक्स ऑफिसवर विक्रमी कमाई केली आहे. अवघ्या ४० कोटींच्या बजेटमध्ये बनलेल्या या चित्रपटाने देशांतर्गत २५१.३० कोटी तर जगभरात तब्बल ३२६.८२ कोटींची कमाई केली. भारतातील सर्वाधिक कमाई करणाऱ्या ॲनिमेटेड चित्रपटांचा विक्रम या एकट्या चित्रपटाने मोडला आहे. महावतार नरसिंह हा चित्रपट अमेरिकेतील क्वालिफाइड कमर्शियल थेटरमध्ये प्रदर्शित झाल्यानंतर ऑस्करच्या पात्रतेत आला. ऑस्करच्या पात्रतेच्या नियमानुसार, अमेरिकेत याच ठिकाणी दिवसातून किमान ३ वेळा आणि सलग ७ दिवस चित्रपट दाखवणे आवश्यक आहे. त्यातील एक शो सायंकाळी ६ ते रात्री १० या प्राईम टाईममध्ये स्लॉट असणे आवश्यक आहे. हे सर्व निकष पूर्ण केल्यानंतर चित्रपटाला शॉर्टलिस्ट करण्यात आले. ॲनिमेशनचा प्रभावी वापर : आपल्या देशात पौराणिक कथांचा खजिना आहे. लहानपणी आपण सर्वांनीच विष्णूच्या अवतारांच्या अनेक गोष्टी ऐकल्या आहेत. त्यापैकीच एक रंजक गोष्ट म्हणजे नरसिंह अवताराची आणि भक्त प्रल्हादाची. ‘महावतार नरसिम्हा’ मध्ये, दिग्दर्शक अश्विन कुमार यांनी चराचरात देव पाहणाऱ्या भक्त प्रल्हाद आणि स्वतःलाच देव मानणाऱ्या असुर हिरण्यकश्यपूची ही कथा ॲनिमेशनच्या अनोख्या शैलीत मांडली आहे. या सिनेमात वराह आणि नरसिंह या दोन कथांचा संगम आहे. यात प्रल्हादाची भक्ती आणि हिंसेलाच सर्वस्व मानणारा हिरण्यकश्यपू यांच्यातील संघर्ष प्रेक्षकांना एका वेगळ्याच जगात घेऊन जातो. इथे चांगुलपणाचा वाईटावर विजय हा विचार नव्या ॲनिमेशन तंत्रज्ञानाचा वापर करून प्रभावीपणे दाखवण्यात आला आहे. पुराणानुसार, खांबातून नरसिंह प्रकट होतात आणि हिरण्यकश्यपूचा वध करतात. सिनेमात नरसिंह आणि हिरण्यकश्यपू यांच्यातील लढाई तब्बल १० ते १२ मिनिटांची आहे. ही लढाई इतकी चित्तथरारक आहे की प्रेक्षक खिळून राहतात. हा सिन या सिनेमाचा परमोच्च बिंदू आणि युनिक सेलिंग पॉइंट ठरला आहे. फ्रँचायझीमधील आगामी चित्रपट : होम्बाले फिल्म्स आणि क्लिम प्रॉडक्शन्सने अधिकृतपणे अनेक अॅनिमेटेड चित्रपटांच्या सीरिजची घोषणा केली आहे. फ्रँचायझीमधील आगामी सिनेमांमध्ये महावतार परशुराम (२०२७), महावतार रघुनंदन (२०२९), महावतार धावकदेश (२०३१), महावतार गोकुलानंद (२०३३) आणि महावतार कल्की (२०३५-२०३७) यांचा समावेश आहे.
