Sunil Tatkare : अजित पवारांच्या निधनानंतर राष्ट्रवादी काँग्रेसच्या राजकारणात अनेक बदल झाले. मात्र आता पक्षाने आपले महत्त्वाचे राजकीय वजन पुन्हा दाखवण्यास सुरुवात केली आहे. अजितदादांच्या हातात असलेले राज्याचे अर्थखाते सध्या मुख्यमंत्री देवेंद्र फडणवीस सांभाळत आहेत. पण हे खाते पुन्हा राष्ट्रवादी काँग्रेसकडेच यावे, यासाठी पक्षाने आता जोरदार मोर्चेबांधणी सुरू केली आहे.  (Sunil Tatkare)

‘अर्थखातं आम्हाला मिळालंच पाहिजे!’ असा थेट आणि ठाम पवित्रा पक्षाचे प्रदेशाध्यक्ष सुनील तटकरे यांनी घेतला आहे. अजित पवारांच्या आर्थिक योगदानाचा दाखला देत त्यांनी आपली भूमिका मांडली. विशेष म्हणजे, काही दिवसांपूर्वी उपमुख्यमंत्री सुनेत्रा पवार यांच्यासह राष्ट्रवादीच्या वरिष्ठ नेत्यांनी मुख्यमंत्री फडणवीस यांची भेट घेतली होती. त्यामुळे आता राष्ट्रवादीच्या या मागणीवर भाजप काय निर्णय घेणार, याकडे संपूर्ण राज्याच्या राजकीय वर्तुळाचे लक्ष लागले आहे.

 

सुनील तटकरे  (Sunil Tatkare )हे आज बारामती येथे दिवंगत अजित पवार यांच्या स्मृतिस्थळावर त्यांच्या प्रतिमेला अभिवादन करण्यासाठी गेले होते. यावेळी माध्यमांशी संवाद साधताना त्यांना अर्थखात्याच्या मागणीबाबत प्रश्न विचारण्यात आला. त्यावर त्यांनी कोणतीही संदिग्ध भूमिका न घेता राष्ट्रवादीला अर्थखाते मिळालेच पाहिजे, असे स्पष्ट केले.  (Sunil Tatkare)

तटकरे म्हणाले, “अर्थखातं आम्हाला मिळालंच पाहिजे. कारण स्वर्गीय दादांनी विक्रमी अर्थसंकल्प या राज्याला दिले. २०१० मध्ये अर्थसंकल्प सादर करण्याची संधी मला दादांमुळे मिळाली होती. तेव्हा मी ५० वा अर्थसंकल्प सादर केला होता.”

पुढे ते म्हणाले, “दादांनी ११ अर्थसंकल्प दिलेत. महाराष्ट्रातील २१ व्या शतकातील दुसऱ्या दशकातील आर्थिक जडणघडण करण्यामध्ये दादांचं योगदान मोठं आहे. त्यामुळे स्वाभाविक आम्हाला अर्थखातं मिळालंच पाहिजे, ही आमची ठाम भूमिका आहे.”

अर्थखात्यासाठी राष्ट्रवादीने केवळ मागणीच केलेली नाही, तर त्यासाठी राजकीय पातळीवरही हालचाली सुरू केल्या आहेत. काही दिवसांपूर्वी राष्ट्रवादी काँग्रेस (अजित पवार) पक्षाच्या कोअर कमिटीची बैठक पार पडली होती. या बैठकीनंतर उपमुख्यमंत्री सुनेत्रा पवार, सुनील तटकरे आणि पक्षातील इतर वरिष्ठ नेत्यांनी मुख्यमंत्री देवेंद्र फडणवीस यांच्या ‘वर्षा’ या शासकीय निवासस्थानी जाऊन भेट घेतली होती.

या भेटीमागे नेमका काय राजकीय अजेंडा होता, याबाबत चर्चा सुरू झाली होती. मात्र, राष्ट्रवादीचे ज्येष्ठ नेते छगन भुजबळ यांनी माध्यमांशी बोलताना या भेटीमागचे कारण स्पष्ट केले. अजित पवारांकडे असलेले अर्थखाते पुन्हा राष्ट्रवादी काँग्रेसकडे देण्यात यावे, हीच आमची प्रमुख मागणी असल्याचे त्यांनी सांगितले होते.