Sunil Tatkare Vs Ramdas Kadam:  दिवंगत उपमुख्यमंत्री अजित पवार यांच्या विमान अपघाती निधनानंतर अनेक आरोप-प्रत्यारोप करण्यात आले. यातच शिवसेना शिंदे गटाचे नेते रामदास कदम यांनी अजित पवार यांच्या घातपातप्रकरणी राष्ट्रवादीचे खासदार सुनील तटकरे यांची चौकशी करा, अशी मागणी केली. यावर आता सुनील तटकरे यांनी प्रतिक्रिया देत रामदास कदम यांना कायदेशीर नोटिस बजावणार असल्याचा इशारा दिला आहे.

नेमकं काय म्हणाले सुनील तटकरे?
“जागतिक कीर्तीचे थोर विचारवंत, थोर समाजसेवक, संस्कृतीहीन रामदास कदम यांनी जे माझ्यावर आरोप केले ते खोटे आहेत. त्याचा मी तीव्र शब्दांत निषेध करतो. रामदास कदम यांनी माझ्यावर केलेले आरोप खोटे आहेत. रामदास कदमांची मानसिक स्थिती ठिक नाही, उपचार ठाण्याऐवजी आग्र्याला करावेत,” असा टोलाही तटकरे यांनी रामदास कदम यांना लगावला.

तसेच तटकरे हे अंतुले साहेबांचा पीए होते, अंतुले साहेबांना यांनीच संपवलं. जो जो माणूस तटकरेला जवळ करतो, त्यालाच संपवण्याचं काम तो करतोय, असाही आरोप कदम यांनी केला होता. यावरही तटकरे यांनी उत्तर देत आरोप फेटाळले आहे.

तटकरे म्हणाले की, “अंतुले साहेबांनी माझ्यावर पुत्रवत प्रेम केलं. त्यांनी कार्यकर्ता म्हणून मला संधी दिली. त्याचा मी नेहमीच आदराने उल्लेख करतो. मी त्यांचा कधी पीए नव्हतोच. जे ह्यांना माहिती नसतं ते बोलत राहतात. याउलट ह्यांनी अंतुले यांच्याविरोधात किती गरळ ओकली हे सर्वांनी अनुभवलं आहे. त्यामुळे अंतुल साहेबांच्या नेतृत्वावर बोलण्याचा नैतिक अधिकार रामदास कदम यांना नाही. अंतुलेंबाबत धर्मांध पद्धतीने आरोप केले आहेत, त्यांना बोलण्याचा अधिकार नाही, याप्रकरणी रामदास कदमांना कायदेशीर नोटीस देणार आहे, ” असा इशाराही तटकरेंनी दिला आहे.

कदम यांच्यावर आरोप करत तटकरे पुढे म्हणाले, “नारायण राणे यांनी जेव्हा शिवसेना सोडली, तेव्हा तत्कालीन आमदार गोपीनाथ मुंडे यांचे विरोधी पक्षनेतेपदाचे पत्र आले होते. त्यावेळी हेच रामदास कदम माझ्या ‘मेघदूत’ बंगल्यावर आले होते. माझ्या हाता-पाया पडले, विनवणी केली. त्यानंतर मी त्यांना माझ्या गाडीतून अजित दादांकडे घेऊन गेलो, तेव्हा कुठे ते विरोधी पक्षनेते झाले. हे खरे की खोटे, हे त्यांनी ज्या जागृत देवस्थानाला मानतात तिथे जाऊन सांगावं.”

“माझ्यावर आरोप करण्यापेक्षा ठाकरे गटाचे नेते अनिल परब यांनी त्यांच्यावर आरोप केले आहेत. त्यावर त्यांनी स्वत:चा खुलासा करावा. स्वत:ची प्रतिमा काय आहे ते त्यांनी लोकांसमोर दाखवावी एवढंच मला सांगायचं आहे”, असं ते म्हणाले. Sunil Tatkare Vs Ramdas Kadam

हेही वाचा:  

Pawan Kalyan : १३ वर्षांचा संसार मोडला! पवन कल्याण तिसऱ्या पत्नीपासून झाले विभक्त, सहमतीने वेगळा होण्याचा निर्णय