Maharashtra Weather Update : राज्यातील काही भागांत पावसाने हजेरी लावली असली तरी अनेक जिल्ह्यांमध्ये अद्यापही शेतकरी दमदार पावसाच्या प्रतीक्षेत आहेत. दरम्यान, बंगालच्या उपसागरातील बदलत्या हवामान प्रणालीमुळे महाराष्ट्रात पुन्हा पावसाचा जोर वाढण्याची शक्यता आहे. २० ते २५ सप्टेंबरदरम्यान महाराष्ट्र आणि गोवा परिसरात पावसाच्या प्रमाणात वाढ होण्याचा अंदाज हवामान अभ्यासकांकडून व्यक्त करण्यात आला आहे. (Maharashtra Weather Update)

ज्येष्ठ हवामानशास्त्रज्ञ कृष्णानंद होसाळीकर यांच्या माहितीनुसार, या कालावधीत राज्याच्या अंतर्गत भागातही पावसाचा जोर वाढण्याची शक्यता आहे. विशेषतः १९ ते २२ सप्टेंबरदरम्यान सांगली, सातारा, कोल्हापूर आणि पुणे जिल्ह्यांत मध्यम ते मुसळधार पाऊस होण्याची शक्यता आहे. २१ सप्टेंबरला नाशिकमध्येही मध्यम स्वरूपाचा पाऊस पडण्याचा अंदाज आहे. अहिल्यानगर, मराठवाडा आणि विदर्भातील काही भागांतही पावसाची शक्यता असून, २२ सप्टेंबरला मराठवाड्यात पाऊस राहण्याचा अंदाज आहे. (Maharashtra Weather Update)

२१ ते २८ सप्टेंबरदरम्यान अनेक भागांत पावसाची शक्यता

हवामानाच्या अंदाजानुसार २१ ते २८ सप्टेंबरदरम्यान महाराष्ट्राच्या बहुतांश भागांत चांगला पाऊस होण्याची शक्यता आहे. मान्सूनच्या अंतिम टप्प्यात होणाऱ्या या पावसामुळे पावसाच्या खंडामुळे अडचणीत आलेल्या भागांना काहीसा दिलासा मिळण्याची शक्यता आहे. विशेषतः खरीप पिकांसाठी या काळातील पाऊस महत्त्वाचा ठरू शकतो. (Maharashtra Weather Update)

परभणीत ४० दिवसांनंतर पावसाची हजेरी

परभणी जिल्ह्यात जवळपास ४० दिवसांच्या प्रतीक्षेनंतर पावसाने हजेरी लावली. पहाटेपासून परभणी शहरासह जिल्ह्यातील विविध भागांत पावसाच्या सरी सुरू झाल्या. पावसाच्या दीर्घ खंडामुळे सोयाबीन, कापूस आणि तूर यासह खरीप पिकांवर परिणाम झाला होता. त्यामुळे या पावसामुळे शेतकऱ्यांच्या आशा पुन्हा पल्लवित झाल्या आहेत. मात्र, पिकांना प्रत्यक्ष किती फायदा होईल, हे आगामी काळातील पावसाच्या प्रमाणावर अवलंबून राहणार आहे. (Maharashtra Weather Update)

धाराशिवमध्ये मध्यरात्री हलक्या सरी

धाराशिव जिल्ह्यातही मध्यरात्री हलक्या स्वरूपाच्या पावसाच्या सरी बरसल्या. दीड महिन्याहून अधिक काळ पावसाची प्रतीक्षा असलेल्या शेतकऱ्यांसाठी हा पाऊस दिलासादायक ठरला असला, तरी जमिनीची तहान मोठी असल्याने आणखी दमदार पावसाची गरज आहे. पुढील काळात चांगला पाऊस व्हावा, अशी अपेक्षा शेतकऱ्यांकडून व्यक्त होत आहे. (Maharashtra Weather Update)

लातूरमध्ये दीड महिन्यानंतर पाऊस

लातूर शहर आणि परिसरातही दीड महिन्याच्या खंडानंतर पावसाने हजेरी लावली. रात्री दीड वाजल्यानंतर ढगांच्या गडगडाटासह हलक्या ते मध्यम स्वरूपाच्या सरी बरसल्या. पावसामुळे वातावरणात गारवा निर्माण झाल्याने उकाड्याने त्रस्त नागरिकांना दिलासा मिळाला. जोरदार वारे आणि विजांच्या कडकडाटासह पाऊस झाल्याने शहरातील काही भागांत वीजपुरवठाही खंडित झाला. (Maharashtra Weather Update)

हिंगोलीत जोरदार पाऊस; खरीप पिकांना दिलासा

हिंगोली जिल्ह्यात गेल्या दीड महिन्यापासून पावसाचा मोठा खंड पडला होता. मात्र, रात्रीपासून जिल्ह्यातील अनेक भागांत जोरदार पावसाने हजेरी लावली. विजांचा कडकडाट आणि वादळी वाऱ्यासह झालेल्या पावसामुळे पावसाअभावी कोमेजलेल्या खरीप पिकांना काही प्रमाणात दिलासा मिळण्याची शक्यता आहे. (Maharashtra Weather Update)

पावसाच्या खंडाचा सर्वाधिक फटका सोयाबीन पिकाला बसल्याचे शेतकऱ्यांचे म्हणणे आहे. अनेक ठिकाणी पिके कोमेजू लागली होती. त्यामुळे आता झालेला पाऊस पिकांसाठी कितपत फायदेशीर ठरतो, हे पुढील काही दिवसांतील पावसाच्या स्थितीवर अवलंबून असेल. (Maharashtra Weather Update)

एकंदरीत, सप्टेंबरच्या उत्तरार्धात राज्यात पुन्हा पावसाचा जोर वाढण्याची शक्यता असल्याने पावसाच्या प्रतीक्षेत असलेल्या शेतकऱ्यांना काहीसा दिलासा मिळण्याची अपेक्षा आहे. मात्र, जिल्हानिहाय पावसाची तीव्रता आणि कालावधी वेगवेगळा असू शकतो. (Maharashtra Weather Update)

Maharashtra Weather Update : ऊन-सावल्यांचा खेळ अन् विजांचा कडकडाट! महाराष्ट्रातील ‘या’ जिल्ह्यांना पावसाचा इशारा