पुणे – वसंतदादा शुगर इन्स्टिटयूट ही साखर उद्योगाच्या शिक्षण व प्रशिक्षण विषयक गरजा भागविणारी देशातील एक अग्रणी शिक्षण संस्था आहे. शैक्षणिक विभागामार्फत साखर उद्योगासाठी लागणा-या तज्ज्ञ मनुष्यबळाची गरज दिवसेंदिवस वाढत आहे. संस्थेमधून प्रशिक्षण घेतलेले विद्यार्थी साखर तसेच अन्य संलग्न उद्योगामध्ये विविध पदावर काम करत असून संस्थेतील प्रशिक्षण साखर उद्योगाला निश्चितच फायदेशीर ठरत आहे. भारत सरकारचे अन्न व पुरवठा विभागाने संस्थेतील विविध पदव्युत्तर डिग्री, डिप्लोमा व सर्टिफिकेटस् अभ्यासक्रमांना मान्यता दिली असून भारत सरकारचे ए. एन. एस. आय. कानपूरचे धर्तीवर सर्व अभ्यासक्रमास समान मान्यता दिली आहे. संस्थेमार्फत शुगर टेक्नॉलॉजी, इंडस्ट्रियल फर्मेंटेशन अॅन्ड अल्कोहोल टेक्नॉलॉजी, शुगर इंजिनिअरींग डिप्लोमा, शुगर इंस्ट्रूमेंटेशन टेक्नॉलॉजी इ. पदव्युत्तर अभ्यासक्रम तसेच शुगर इंजिनिअरिंग सर्टिफिकेट, शुगर मॅन्युफॅक्चरिंग सर्टिफिकेट, शुगर बॉयलिंग सर्टिफिकेट, ज्यूस सुपरव्हिजन इ. सर्टिफिकेट अभ्यासक्रम याशिवाय सावित्रीबाई फुले पुणे विद्यापीठ संलग्न एनव्हॉरर्नमेंटल सायन्सेस, वाईन बूबींग अॅण्ड अल्कोहोल टेक्नॉलॉजी मास्टर डिग्री, हे अभ्यासक्रम राबविले जातात. संस्थेने सातत्याने वाढलेली शैक्षणिक गुणवत्ता आणि उच्चदर्जाचे अध्यापन या वैशिष्टयामुळे संस्थेस देशात व परदेशात नावलौकीक प्राप्त झाला आहे. साखर कारखान्यांना सद्या तांत्रिक मनुष्यबळाची मोठया प्रमाणात उणीव भासत आहे. कारखान्यामध्ये त्याचा परिणाम कार्यक्षमतेवर सुध्दा झाला आहे. हे ओळखुन संस्थेमध्ये नव्याने महाराष्ट्र राज्य कौशल्य, व्यवसाय शिक्षण व प्रशिक्षण मंडळ यांच्या मान्यतेने संस्थेमध्ये प्रथमच एस. एस. सी. व बी.एस.सी. उत्तीर्ण झालेल्या विद्यार्थ्यांसाठी खालील अभ्यासक्रम नव्याने सुरू करण्यात येत आहे. सर्टिफिकेट कोर्स इन क्वॉलिटी कंट्रोल लॅबोरेटरी टेक्नीशिअन, सर्टिफिकेट कोर्स इन फिटर, सर्टिफिकेट कोर्स इन इलेक्ट्रीशिअन इ. अभ्यासक्रम सहा महिन्याचे असुन सर्टिफिकेट कोर्स इन बॉयलर अॅटेन्डट हा अभ्यासक्रम एक वर्ष कालावधीचा आहे. वरील अभ्यासक्रम पूर्ण केल्यानंतर विद्यार्थ्यांना ग्रामिण भागात असलेल्या साखर कारखान्यांवर रोजगाराची संधी उपलब्ध होण्यासाठी ते पात्र होतील व कारखान्यातील विविध पदावर त्यांना पदोन्नतीच्या संधी मिळतील. अ धिक माहितीसाठी www.vsisugar.com या संकेतस्थळाला भेट द्यावी, अशी माहिती संस्थेचे महासंचालक संभाजी कडु पाटील यांनी दिली आहे.
