Maharashtra State Drama Festival : महाराष्ट्र राज्य नाट्य महोत्सवांतर्गत आयोजित हौशी नाट्य स्पर्धांमध्ये स्थानिक कलाकारांना अधिक संधी मिळावी, यासाठी सांस्कृतिक कार्य विभागाने स्पर्धेच्या नियमावलीत महत्त्वपूर्ण बदल केला आहे. सांस्कृतिक कार्यमंत्री ॲड. आशिष शेलार यांच्या निर्देशानुसार हा निर्णय घेण्यात आला आहे.

महाराष्ट्र राज्य नाट्य महोत्सवांतर्गत हौशी मराठी, हिंदी, संगीत, संस्कृत, बालनाट्य आणि दिव्यांग बालनाट्य स्पर्धा राज्यातील २४ केंद्रांवर घेतल्या जातात. सुधारित नियमांनुसार स्पर्धेत सहभागी होणारा कलाकार संबंधित स्पर्धा केंद्राच्या जिल्ह्यातील स्थानिक रहिवासी असणे आता बंधनकारक करण्यात आले आहे.

गेल्या काही वर्षांत हौशी नाट्य स्पर्धांमधील पारितोषिकांच्या रकमेत मोठी वाढ झाली आहे. त्यामुळे काही ठिकाणी परजिल्ह्यातील कलाकार स्थानिक नाट्यसंस्थांच्या माध्यमातून अन्य जिल्ह्यांतील स्पर्धा केंद्रांवर सहभागी होत असल्याच्या तक्रारी सांस्कृतिक कार्य विभागाकडे प्राप्त झाल्या होत्या. यामुळे स्थानिक हौशी कलाकारांच्या संधी कमी होत असल्याचे निदर्शनास आले.

या पार्श्वभूमीवर स्थानिक कलाकारांच्या हिताला प्राधान्य देत नियमावलीत बदल करण्यात आला आहे. ग्रामीण आणि शहरी भागातील स्थानिक नाट्यसंस्थांना हक्काचे व्यासपीठ मिळावे, नवोदित कलाकारांना संधी मिळावी आणि त्यांच्या कलागुणांना प्रोत्साहन मिळावे, हा या निर्णयाचा उद्देश आहे.

दरम्यान, राज्य नाट्य स्पर्धेसाठीच्या प्रवेशिका २५ सप्टेंबर २०२६ पर्यंत mahanatyaspardha.com या संकेतस्थळावर उपलब्ध आहेत. राज्यातील अधिकाधिक हौशी कलाकार आणि नाट्यसंस्थांनी या स्पर्धेत सहभागी व्हावे, असे आवाहन सांस्कृतिक कार्य संचालक प्रशांत खेडेकर यांनी केले आहे.