Maharashtra Rain Updates : केरळनंतर आता मान्सूनने गोव्यातही हजेरी लावली असून महाराष्ट्राच्या दिशेने त्याची वाटचाल सुरू झाली आहे. भारतीय हवामान विभागाच्या माहितीनुसार, राज्यात पुढील दोन ते तीन दिवसांत मान्सून दाखल होण्यासाठी अनुकूल परिस्थिती निर्माण झाली आहे. त्यामुळे यंदा महाराष्ट्रात मान्सून वेळेत पोहोचण्याची शक्यता वर्तवली जात आहे. (Maharashtra Rain)

दरम्यान, सिंधुदुर्ग जिल्ह्यात मान्सूनपूर्व पावसाने हजेरी लावली आहे. कुडाळ तालुक्यासह जिल्ह्यातील अनेक भागांत हलक्या ते मध्यम स्वरूपाच्या सरी कोसळल्या. हवामान विभागाने जिल्ह्यात 10 ते 20 मिमी पावसाचा अंदाज व्यक्त करत यलो अलर्ट जारी केला आहे. (Maharashtra Rain)

तर परभणी जिल्ह्यातही मान्सूनपूर्व पावसाने दमदार हजेरी लावली. विजांचा कडकडाट आणि वादळी वाऱ्यासह झालेल्या पावसामुळे उकाड्याने त्रस्त नागरिकांना दिलासा मिळाला. काही ठिकाणी रस्त्यांवर पाणी साचले, तर शेतकऱ्यांमध्ये समाधानाचे वातावरण पाहायला मिळाले. या पावसामुळे शहरासह ग्रामीण भागातील वातावरण आल्हाददायक झाले आहे. (Maharashtra Rain)

यंदा मान्सूनचा केरळमधील प्रवेश नेहमीपेक्षा तीन दिवस उशिरा झाला. साधारणपणे 1 जूनला केरळमध्ये दाखल होणारा मान्सून यंदा 4 जूनला पोहोचला. मात्र, हवामान विभागाचे तज्ज्ञ प्रवीण कुमार यांनी सांगितले की, मान्सूनच्या पुढील प्रवासासाठी परिस्थिती अनुकूल असून कोकणात पुढील 48 तासांत पावसाची शक्यता आहे. (Maharashtra Rain)

हवामान विभागानुसार, विदर्भात सध्या तापमान 40 ते 42 अंश सेल्सिअसच्या दरम्यान राहण्याची शक्यता आहे. मात्र, 10 जूननंतर तापमानात घट होण्याचा अंदाज व्यक्त करण्यात आला आहे. दक्षिण महाराष्ट्र आणि कोकणातील काही भागांत पुढील दोन दिवसांत पावसाची तीव्रता वाढू शकते, अशी माहितीही हवामान तज्ज्ञांनी दिली आहे. (Maharashtra Rain)