Maharashtra Premier League 2024 (Match No 16) :- महाराष्ट्र क्रिकेट संघटनेच्या (एमसीए) वतीने आयोजित महाराष्ट्र प्रीमियर लीग (एमपीएल) स्पर्धेत कर्णधार राहुल त्रिपाठी (६३ धावा) याने केलेल्या अर्धशतकी खेळीसह श्रेयस चव्हाण (४-१४) याने केलेल्या भेदक गोलंदाजीच्या जोरावर पुनीत बालन ग्रुप कोल्हापूर टस्कर्स संघाने रत्नागिरी जेट्स संघाचा २ धावांनी पराभव करून दुसरा विजय मिळवला.

गहुंजे येथील महाराष्ट्र क्रिकेट असोसिएशनच्या आंतरराष्ट्रीय मैदानावर सुरु झालेल्या या स्पर्धेत रत्नागिरी जेट्स संघाने नाणेफेक जिंकून गोलंदाजी करण्याचा निर्णय घेतला. रत्नागिरीच्या गोलंदाजांनी प्रभावी मारा करत कर्णधाराने घेतलेला निर्णय सार्थ ठरविला. हर्ष संघवी(१), अंकित बावणे(२) यांना झटपट बाद करून सलामीची जोडी लवकर तंबूत पाठवली. दिव्यांग हिंगणेकरने अंकित बावणेला, तर प्रदीप दाढेने हर्ष संघवीला झेल बाद केले. योगेश चव्हाणने हे दोन्ही झेल अप्रतिमरीत्या झेलले. त्यानंतर कर्णधार राहुल त्रिपाठीने ३९चेंडूत ६३धावांची आक्रमक खेळी केली. त्यात त्याने ७चौकार व ३ उत्तुंग षटकार खेचले. राहुलला सिद्धार्थ म्हात्रेने ३६चेंडूत १चौकार व ३षटकारासह ४४धावा काढून साथ दिली.

राहुल व सिद्धार्थ यांनी तिसऱ्या विकेटसाठी ३६ चेंडूत ५० धावांची भागीदारी करून संघाचा डाव सावरला. पण याचवेळी कर्णधार अझीम काझीने राहुल त्रिपाठीला ६३धावांवर झेल बाद करून त्याचा अडसर दुर केला. पाठोपाठ सिद्धार्थ म्हात्रे चोरटी धाव घेत असताना समन्वयाच्या अभावामुळे धावबाद झाला. त्यानंतर योगेश डोंगरे(नाबाद २८),अनिकेत पोरवाल(१०), श्रीकांत मुंढे(१६धावा)यांनी धावा काढून संघाला २०षटकात ७बाद १६९धावांचे आव्हान उभे केले. रत्नागिरी जेट्सकडून सत्यजीत बच्छावने ३१धावात ३गडी बाद केले. तर, अझीम काझी(१-१७), दिव्यांग हिंगणेकर(१-२२), प्रदीप दाढे (१-१३)यांनी प्रत्येकी एक गडी बाद केला.

राहुल त्रिपाठी आणि सिद्धार्थ म्हात्रेच्या दमदार भागीदारीच्या जोरावर पीबीजी कोल्हापूर टस्कर्स संघाने रत्नागिरी जेट्स संघाला पराभूत केले. #MPL #MPL2024 #MahaCricket #MCA pic.twitter.com/8IYPzy4FFC

— Maharashtra Cricket Association (@MahaCricket) June 11, 2024

विजयासाठी १७० धावांचे आव्हान घेऊन मैदानात उतरलेल्या रत्नागिरी जेट्स संघाला २० षटकात ७ बाद १६७ धावाच करता आल्या. प्रीतम पाटीलने १६ चेंडूत ४ चौकार व ३ षटकाराच्या मदतीने ३८धावा चोपल्या. प्रीतमने धीरज फटांगरे (१०धावा) च्या साथीत २२चेंडूत ५० धावांची भागीदारी करून संघाला चांगली सुरुवात करून दिली. पॉवरप्लेमध्ये पाचव्या षटकात फिरकीपटू श्रेयस चव्हाणने प्रीतम पाटील(३८), धीरज फटांगरे(१०) या सलामी जोडीला बाद करून सामन्यात रंगत निर्माण केली. त्यानंतर कर्णधार अझीम काझीने ३०चेंडूत १चौकार व १षटकारासह ३०धावा, तर दिव्यांग हिंगणेकरने २५चेंडूत २षटकाराच्या मदतीने २४धावा करून संघाची धावगती वाढवण्याचा प्रयत्न केला. पण श्रेयस चव्हाणने पुन्हा एकदा आपल्या फिरकीच्या जाळ्यात अझीम काझीला ३० धावांवर बाद करून रत्नागिरी जेट्सला मोठा धक्का दिला.

T20 World Cup 2024 (IND vs USA) : टीम इंडियाला सातासमुद्रापार ‘आपल्याच लोकांकडून’ मोठा धोका; एका चुकीमुळे होऊ शकते पाकिस्तानसारखी अवस्था…

विजयासाठी रत्नागिरी संघाला २५चेंडूत ५३ धावांची आवश्यकता होती. सातव्या क्रमांकावर फलंदाजीस उतरलेल्या निखिल नाईकने १७चेंडूत नाबाद ३७धावांची केलेली धडाकेबाज खेळी अपुरी ठरली. त्यात त्याने ४ उत्तुंग षटकार मारले. शेवटच्या षटकात ६ चेंडूत २४ धावांची आवश्यकता असताना निखिल नाईकने ३ षटकार मारून सामन्याला कलाटणी देण्याचा प्रयत्न केला. पण तो यशस्वी ठरला नाही. कोल्हापूर टस्कर्सच्या श्रेयस चव्हाणने १४ धावात ४ गडी बाद करून संघाच्या विजयात मोलाचा वाटा उचलला. त्याला श्रीकांत मुंढे(१-२५), मनोज यादव(१-४२) यांनी प्रत्येकी एक गडी बाद करून साथ दिली.

MPL 2024 : छत्रपती संभाजी किंग्सचा तिसरा विजय, पुणेरी बाप्पाचा 7 गडी राखून केला पराभव…

संक्षिप्त धावफलक – पुनीत बालन ग्रुप कोल्हापूर टस्कर्स : २० षटकात ७ बाद १६९ धावा. (राहुल त्रिपाठी ६३, सिद्धार्थ म्हात्रे ४४, योगेश डोंगरे नाबाद २८, अनिकेत पोरवाल १०, श्रीकांत मुंढे १६, सत्यजीत बच्छाव ३-३१, अझीम काझी १-१७, दिव्यांग हिंगणेकर १-२२, प्रदीप दाढे १-१३) वि. वि. रत्नागिरी जेट्स : २० षटकात ७ बाद १६७ धावा. (प्रीतम पाटील ३८, निखिल नाईक नाबाद ३७, अझीम काझी ३०, दिव्यांग हिंगणेकर २४, योगेश चव्हाण १४, अभिषेक पवार ११, श्रेयस चव्हाण ४-१४, श्रीकांत मुंढे १-२५, मनोज यादव १-४२). सामनावीर – श्रेयस चव्हाण.