Monsoon Update : राज्यात मान्सूनच्या आगमनाची प्रतीक्षा सुरू असतानाच मान्सूनपूर्व पावसाने अनेक जिल्ह्यांना झोडपून काढले आहे. हिंगोली, वाशिम, परभणी, जळगाव आणि गोंदिया जिल्ह्यांत वादळी वाऱ्यांसह मुसळधार पाऊस झाला. या पावसामुळे उकाड्यापासून दिलासा मिळाला असला तरी अनेक ठिकाणी मालमत्तेचे नुकसान झाले असून काही दुर्दैवी घटनाही घडल्या आहेत. (Monsoon Update)

हिंगोलीत जोरदार पावसाची हजेरी

हिंगोली जिल्ह्यात अनेक भागांत विजांच्या कडकडाटासह आणि सोसाट्याच्या वाऱ्यांसह जोरदार पाऊस झाला. अचानक आलेल्या पावसामुळे शेतकऱ्यांची धावपळ उडाली असून शेतमालाचे नुकसान झाल्याची प्राथमिक माहिती समोर आली आहे. अनेक भागांत वातावरणात गारवा निर्माण झाला. (Monsoon Update)

वाशिममध्ये वादळी वाऱ्यांचा तडाखा

वाशिम जिल्ह्यातील मालेगाव तालुक्यात मान्सूनपूर्व पावसाने जोरदार हजेरी लावली. मालेगाव शहरासह तालुक्यातील विविध भागांत मुसळधार पाऊस झाला. वादळी वाऱ्यांमुळे काही काळ वाहतुकीवर परिणाम झाला असून वाहनचालकांना रस्त्याच्या कडेला वाहने थांबवावी लागली. (Monsoon Update)

वाशिम तालुक्यातील ढिल्ली गावात वादळाचा मोठा फटका बसला. जोरदार वाऱ्यामुळे वीज वितरणाची डीपी कोसळली, तर अनेक वीजखांब उन्मळून पडले. घरांवरील आणि कोठारांवरील पत्रे उडाल्याने नुकसान झाले असून गावातील वीजपुरवठा खंडित झाला आहे. (Monsoon Update)

कारंजा तालुक्यातील कामरगाव परिसरातही मध्यम स्वरूपाचा पाऊस झाला. या पावसामुळे शेती मशागतीच्या कामांना गती मिळण्याची अपेक्षा व्यक्त केली जात आहे.

परभणीत दुर्दैवी घटना

परभणी जिल्ह्यातील इंदेवाडी शिवारात वादळी वाऱ्यासह झालेल्या पावसादरम्यान दुर्दैवी घटना घडली. घराची भिंत कोसळून तिच्या ढिगाऱ्याखाली दबून 11 वर्षीय दिपाली नंदगे हिचा मृत्यू झाला. या घटनेमुळे गावात हळहळ व्यक्त होत असून संपूर्ण परिसरावर शोककळा पसरली आहे. (Monsoon Update)

जळगावात अर्धा तास मुसळधार वर्षाव

जळगाव शहरासह जिल्ह्यातील अनेक भागांत वादळी वाऱ्यांसह मुसळधार पाऊस झाला. शहरात सुमारे अर्धा तास जोरदार पाऊस कोसळल्याने रस्त्यांवर पाणी साचले. कार्यालये आणि कामावरून घरी परतणाऱ्या नागरिकांची मोठी धावपळ उडाली. (Monsoon Update)

गोंदियाला ऑरेंज अलर्ट

गोंदिया जिल्ह्यातही मान्सूनपूर्व पावसाचा प्रभाव दिसून आला आहे. नवतपाच्या काळात उष्णतेने त्रस्त झालेल्या नागरिकांना तापमानात झालेल्या घटेमुळे दिलासा मिळाला आहे. हवामान विभागाने गोंदिया जिल्ह्यासाठी ऑरेंज अलर्ट जारी केला असून मेघगर्जना, जोरदार पाऊस आणि गारपिटीची शक्यता वर्तवली आहे. (Monsoon Update)

उद्यापासून जिल्ह्यासाठी यलो अलर्ट लागू करण्यात आला असून वादळी वाऱ्यांसह पावसाचा अंदाज कायम आहे.

हवामान खात्याचा इशारा

राज्यातील अनेक भागांत पुढील काही दिवस मान्सूनपूर्व पावसाची शक्यता कायम राहणार आहे. नागरिकांनी वादळी वाऱ्यांदरम्यान सुरक्षित ठिकाणी राहावे, तर शेतकऱ्यांनी शेतमाल आणि कृषी साहित्य सुरक्षित ठेवावे, असे आवाहन प्रशासन आणि हवामान विभागाकडून करण्यात आले आहे. (Monsoon Update)