Maharashtra Politics : गेल्या काही दिवसांपासून महाराष्ट्राच्या राजकीय (Maharashtra Politics) वर्तुळात ‘ऑपरेशन टायगर’ची जोरदार चर्चा सुरू आहे. माजी मुख्यमंत्री उद्धव ठाकरे यांच्या शिवसेना पक्षाचे काही खासदार लवकरच उपमुख्यमंत्री एकनाथ शिंदे यांच्या शिवसेनेत दाखल होणार असल्याचा दावा केला जात आहे.

यापूर्वी ठाकरे गटाच्या काही खासदारांनी मुख्यमंत्री एकनाथ शिंदे आणि त्यांच्या पक्षातील प्रमुख नेत्यांच्या (Maharashtra Politics) गुप्त भेटी घेतल्याचेही समोर आले होते. त्यामुळे ठाकरे गटाला पुन्हा एकदा खिंडार पडणार का, अशा चर्चांना उधाण आले होते.

दरम्यान, आता याच कथित खासदारफुटीच्या मुद्द्यावर एक मोठी आणि महत्त्वाची माहिती समोर आली आहे. ठाकरे गटाचे खासदार आणि मुख्य प्रवक्ते संजय राऊत यांनी पत्रकारांशी बोलताना या सर्व चर्चांमागचं खरं सत्य काय आहे, याबाबत सविस्तर खुलासा केला आहे.

शिवसेना ठाकरे गटाच्या संसदीय गटाची एक महत्त्वाची बैठक पार पडली. या बैठकीला ठाकरे यांच्या पक्षाचे तीन खासदार अनुपस्थित होते, अशी माहिती पसरली होती. हेच तीन खासदार शिंदे गटाच्या वाटेवर असल्याचा (Maharashtra Politics) संशय व्यक्त केला जात होता. या सर्व घडामोडींवर बैठक संपल्यानंतर खासदार संजय राऊत यांनी प्रसारमाध्यमांशी संवाद साधला आणि एकनाथ शिंदे यांच्या कथित ‘ऑपरेशन टायगर’वर सडकून भाष्य केले.

बैठकीत कोण हजर आणि कोण गैरहजर होते याबद्दल सांगताना संजय राऊत यांनी सर्व अफवा खोडून काढल्या. उद्धव ठाकरे यांनी बोलावलेल्या या बैठकीला खासदार अरविंद सावंत, खासदार संजय दिना पाटील, खासदार अनिल देसाई आणि नाशिकचे खासदार राजाभाऊ वाझे हे प्रत्यक्षपणे उपस्थित होते. तर उरलेले पाच खासदार वेगवेगळ्या कौटुंबिक आणि अपरिहार्य कारणांमुळे मुंबईत येऊ शकले नसले, तरी त्यांनी व्हिडीओ कॉन्फरन्सिंगच्या माध्यमातून या बैठकीला हजेरी लावली होती.

प्रत्यक्ष उपस्थित राहू न शकलेल्या खासदारांबद्दल माहिती देताना राऊत म्हणाले की, खासदार ओमराजे निंबाळकर यांचे चिरंजीव सध्या पुण्याच्या दीनानाथ मंगेशकर रुग्णालयात उपचार घेत आहेत, त्यामुळे ओमराजे यांनी रुग्णालयातूनच ऑनलाईन पद्धतीने बैठकीत सहभाग घेतला. खासदार भाऊसाहेब वाकचौरे यांच्या पत्नी आजारी असल्याने ते शिर्डी येथील रुग्णालयातून व्हिडीओ कॉन्फरन्सिंगद्वारे जोडले गेले होते.

तसेच नागेश आष्टीकर यांचे चिरंजीव विधानपरिषदेच्या निवडणुकीला उभे राहिल्यामुळे ते निवडणूक कामात व्यस्त आहेत, तरीही त्यांनी या बैठकीत भाग घेतला. वाशीमचे खासदार संजय देशमुख यांच्या घरी सध्या मुलीच्या लग्नाचे मंगल कार्य सुरू असून, त्या संदर्भातील बैठक असल्याने ते देखील ऑनलाईन पद्धतीने या बैठकीला उपस्थित राहिले होते.

थोडक्यात सांगायचे तर, ठाकरे गटाचे नऊच्या नऊ खासदार या बैठकीला पूर्णपणे उपस्थित होते आणि या बैठकीत उद्धव ठाकरे यांनी सर्वांना पुढील रणनीतीबाबत सविस्तर मार्गदर्शन केले.

जे खासदार आजच्या बैठकीला काही कारणांमुळे प्रत्यक्ष हजर राहू शकले नाहीत, ते पुढच्या तीन दिवसांत प्रत्यक्ष मुंबईत (Maharashtra Politics) ‘मातोश्री’वर येऊन उद्धव ठाकरे यांची भेट घेणार आहेत, अशी माहितीही संजय राऊत यांनी दिली. त्यामुळे ठाकरे गटात कोणतीही फूट नसून ‘ऑपरेशन टायगर’च्या चर्चांमध्ये तथ्य नसल्याचे आता स्पष्ट झाले आहे.