Maharashtra Politics : राज्यातील सत्तासंघर्षानंतर आता स्थानिक स्वराज्य संस्थांमध्येही मोठे फेरबदल (Maharashtra Politics) पाहायला मिळत आहेत. अकोला जिल्ह्यातील बार्शीटाकळी नगरपंचायत आणि अकोट नगरपालिकेतील तब्बल १५ हून अधिक नगरसेवक उपमुख्यमंत्री एकनाथ शिंदे यांच्या शिवसेना गटाच्या संपर्कात असल्याची खळबळजनक माहिती समोर आली आहे.

यामध्ये काँग्रेस, शरद पवार गट (राष्ट्रवादी काँग्रेस) आणि काही अपक्ष नगरसेवकांचा समावेश असून, हे सर्वजण लवकरच जाहीरपणे ‘शिवसेना’ पक्षात प्रवेश करणार असल्याची जोरदार चर्चा राजकीय वर्तुळात रंगली आहे. या मोठ्या राजकीय घडामोडींमुळे (Maharashtra Politics) अकोला जिल्ह्यातील स्थानिक राजकारणात प्रचंड उलथापालथ होण्याची शक्यता वर्तवली जात आहे.

मिळालेल्या माहितीनुसार, बार्शीटाकळी नगरपंचायतीचे अनेक नगरसेवक आजच मुंबईच्या दिशेने रवाना झाले आहेत. मुंबईत उपमुख्यमंत्री एकनाथ शिंदे यांच्या उपस्थितीत या सर्व नगरसेवकांचा अधिकृत पक्षप्रवेश सोहळा पार पडणार असल्याचे सांगितले जात आहे.

भाजप आमदार आणि शिंदेसेनेच्या प्रवक्त्यांमध्ये रंगली मिश्किल टोलेबाजी

एकीकडे या राजकीय हालचालींमुळे विरोधकांचे धाबे दणाणले असताना, दुसरीकडे महायुतीमधील नेत्यांमध्ये मात्र यावरून हलकीफुलकी टोलेबाजी पाहायला मिळाली. या सर्व पार्श्वभूमीवर मूर्तीजापूरचे भाजप आमदार हरीश पिंपळे आणि शिंदेसेनेचे विदर्भातील प्रवक्ते प्रकाश डवले यांच्यातील एक व्हिडिओ समोर आला आहे. या व्हिडिओमध्ये दोन्ही नेत्यांमध्ये नगरसेवकांच्या पक्षप्रवेशावरून रंगलेली मिश्किल चर्चा कॅमेऱ्यात कैद झाली आहे.

भाजप आमदार हरीश पिंपळे यांनी डवले यांना चिमटा काढत म्हटले की, *”जे नगरसेवक आमच्या (भाजपच्या) कामाचे नाहीत, त्यांनाही तुम्ही तुमच्या पक्षात घेऊन टाका.”* त्यांच्या या गुगलीवर प्रकाश डवले यांनीही अत्यंत हजरजबाबीपणे आणि हलक्याफुलक्या (Maharashtra Politics) अंदाजात उत्तर दिले.

डवले म्हणाले की, *”आमच्याकडे मुंबईतील ‘नंदनवन’ (उपमुख्यमंत्र्यांचे निवासस्थान) येथे नगरसेवकांच्या प्रवेशासाठी आधीच प्रचंड गर्दी आहे. अनेक जण अजूनही वेटिंगवर आहेत.”* या दोन्ही नेत्यांमधील हा मजेशीर संवाद ऐकून तिथे उपस्थित असलेल्या कार्यकर्त्यांमध्ये एकच हशा पिकला.

जिल्ह्यातील राजकीय समीकरणे बदलणार

दरम्यान, काँग्रेस आणि शरद पवार गटाला खिंडार पाडत १५ हून अधिक नगरसेवक सत्ताधारी पक्षात जात असल्याने अकोला जिल्ह्यातील राजकीय समीकरणे पूर्णपणे बदलण्याची चिन्हे स्पष्ट दिसत आहेत.

आगामी स्थानिक स्वराज्य संस्थांच्या निवडणुका लक्षात घेता, विरोधी पक्षांसाठी हा मोठा धक्का मानला जात असून, येत्या काळात जिल्ह्यात आणखी काही मोठे राजकीय फेरबदल आणि इतर पक्षांमधील गळती पाहायला मिळू शकते, अशी दाट शक्यता वर्तवली जात आहे.