Eknath Shinde :  उपमुख्यमंत्री एकनाथ शिंदे यांना अनेकदा भाजपकडून डावललं जात असल्याची चर्चा वारंवार सुरू असते. याचदरम्यान, नवी मुंबई महानगर पालिकेच्या कार्यक्रम पत्रिकेवरून एकनाथ शिंदे यांचं नाव वगळण्यात आल्यामुळे शिवसैनिकांनी आक्रमक भूमिका घेतली आहे.

वाशी येथील रूग्णालयात असलेल्या कार्यक्रमाला गणेश नाईक आले असता त्यांची गाडी अडविण्याचा प्रयत्न शिवसेना कार्यकर्त्यांकडून करण्यात आला. यावेळी जोरदार घोषणाबाजीही करण्यात आली.

या पत्रिकेमध्ये खासदार नरेश म्हस्के, एकनाथ शिंदे यांचे सुपूत्र श्रीकांत शिंदे यांचं देखील नाव आहे पण एकनाथ शिंदे यांचं नाव टाकण्यात आलेला नाही. ते राज्याचे उपमुख्यमंत्री आहेत, त्याचबरोबर ठाणे जिल्ह्याचे पालकमंत्री आहेत, या पत्रिकेत त्यांचे नाव नसल्याने शिवसैनिकांकडून रोष व्यक्त केला जात आहे.

दरम्यान, आज विविध आरोग्य विषयक सुविधांचा उद्घाटन सोहळा  वनमंत्री गणेश नाईक यांच्या हस्ते होत आहे. परंतु या कार्यक्रम पत्रिकेवर एकनाथ शिंदे यांचं नाव नसल्याने नवी मुंबईत वाद निर्माण झाला आहे. सध्या परिसरात गोंधळ निर्माण झाला असून पोलिसांचा मोठा फौजफाटा याठिकाणी तैनात करण्यात आला आहे.

शिवसेना स्टाईल उत्तर देण्याचा इशारा   (Eknath Shinde)

यावरून शिवसेनेचे खासदार नरेश म्हस्के यांनी प्रशासन आणि स्थानिक नेतृत्वावर टीका केली. त्यांनी सांगितले की, ठाणे महापालिकेत भाजप-शिवसेना युतीची सत्ता असतानाही सर्व नेत्यांचा सन्मान राखला जातो. मात्र, नवी मुंबईत वारंवार शिवसेना नेत्यांचा अवमान होत असल्याचा आरोप त्यांनी केला. अशा प्रकारांना शिवसेना कार्यकर्ते सहन करणार नसून, या अवमानाला शिवसेना स्टाईलने उत्तर दिले जाईल, असा इशाराही त्यांनी दिला.

या प्रकरणाबद्दल या बद्दल गणेश नाईक यांना विचारलं असता ‘मला त्याची कल्पना नाही. आपण महापालिका आयुक्तांना विचारा’ असं उत्तर त्यांनी दिलं. यावर महापौर बोलतील असेही गणेश नाईक यांनी स्पष्ट केले. Eknath Shinde

हेही वाचा: 

Eye Care: उन्हाळ्यात डोळ्यांत जळजळ, खाज आणि कोरडेपणा वाढतोय? मग या सवयी आजच बदला