Pune Mumbai Missing Link Landslide : मिसिंग लिंकवरून वाहतूक कधी सुरू होणार? महत्वाची अपडेट आली समोर, सध्याची परिस्थिती पाहा….
रस्त्यावर साचलेले दगड आणि माती हटवण्याचे काम युद्धपातळीवर सुरू करण्यात आले आहे. गेल्या काही तासांपासून जेसीबी आणि अन्य यंत्रणांच्या मदतीने रस्ता मोकळा करण्याचे प्रयत्न सुरू आहेत.
Pune Mumbai Missing Link Landslide : राज्यात सुरू असलेल्या मुसळधार पावसामुळे जनजीवन विस्कळीत झाले असून, मुंबई–पुणे महामार्गावरील महत्त्वाचा टप्पा असलेल्या ‘मिसिंग लिंक’ प्रकल्प परिसरात दरड कोसळल्याने वाहतूक पूर्णपणे ठप्प झाली आहे. पुण्याहून मुंबईकडे जाणाऱ्या मार्गावर दुसऱ्या बोगद्याजवळ अचानक दरड कोसळल्याची घटना घडल्याने वाहनचालकांना मोठा फटका बसला आहे.
पुण्याकडून मुंबईकडे जाणाऱ्या मार्गावर दुसऱ्या बोगद्याच्या आधी मोठ्या प्रमाणात दगड आणि माती रस्त्यावर कोसळल्याने मार्ग पूर्णपणे अडथळलेला आहे. या घटनेनंतर तातडीने पोलिस, महामार्ग प्राधिकरण (MSRDC) आणि आपत्कालीन बचाव पथक घटनास्थळी दाखल झाले.
Mumbai-Pune Missing Link landslide
रस्त्यावर साचलेले दगड आणि माती हटवण्याचे काम युद्धपातळीवर सुरू करण्यात आले आहे. गेल्या काही तासांपासून जेसीबी आणि अन्य यंत्रणांच्या मदतीने रस्ता मोकळा करण्याचे प्रयत्न सुरू आहेत. प्रशासनाच्या देखरेखीखाली संपूर्ण कामकाज पार पडत आहे.
प्राथमिक अंदाजानुसार, मिसिंग लिंकवरील वाहतूक पुन्हा सुरळीत होण्यासाठी किमान 5 ते 6 तासांचा वेळ लागू शकतो, मात्र पावसाचा जोर कायम राहिल्यास हा कालावधी वाढण्याची शक्यता नाकारता येत नाही.
दरड कोसळल्यामुळे मुंबई–पुणे मार्गावरील वाहतूक पूर्णपणे विस्कळीत झाली आहे. वाहनचालकांना पर्यायी मार्गांचा वापर करावा लागत आहे. काही वाहनांना थांबवण्यात आले असून काहींना वळवून इतर मार्गांवरून पाठवले जात आहे.
सतत सुरू असलेल्या पावसामुळे परिस्थिती अधिक गुंतागुंतीची बनली आहे. वाहनचालकांना सावधगिरी बाळगण्याचे आणि अनावश्यक प्रवास टाळण्याचे आवाहन प्रशासनाकडून करण्यात आले आहे.
महामार्ग प्रशासन, पोलिस आणि स्थानिक यंत्रणा परिस्थितीवर सतत लक्ष ठेवून आहेत. कोणतीही दुर्घटना घडू नये यासाठी योग्य त्या उपाययोजना करण्यात येत आहेत. नागरिकांनी प्रशासनाच्या सूचनांचे पालन करून सुरक्षित प्रवास करावा, असे आवाहन करण्यात आले आहे.
