Governor Jishnu Dev Varma Honors Blind Womens Cricket Team Dekh Le India : अंध महिलांच्या टी-२० विश्वचषकावर (Blind Women’s T20 World Cup) भारताचे नाव कोरणाऱ्या राष्ट्रीय अंध महिला क्रिकेट संघाच्या सदस्यांचा राज्यपाल जिष्णु देव वर्मा यांच्या हस्ते महाराष्ट्र लोकभवन येथे भव्य सत्कार करण्यात आला. भारतीय अंध महिला क्रिकेट संघाच्या प्रेरणादायी प्रवासावर आधारित ‘देख ले! इंडिया’ (Dekh Le! India) या विशेष माहितीपटाच्या प्रदर्शनानिमित्त या सोहळ्याचे आयोजन करण्यात आले होते.

अनेक मान्यवरांची उपस्थिती –

या दिमाखदार सोहळ्याला उपमुख्यमंत्री सुनेत्रा अजित पवार, विधान परिषदेचे सभापती प्रा. राम शिंदे, राजशिष्टाचार मंत्री जयकुमार रावल, महिला व बालविकास मंत्री आदिती तटकरे, मुंबईच्या महापौर रितु तावडे, एसएनडीटी विद्यापीठाच्या कुलगुरु डॉ. उज्ज्वला चक्रदेव, अंध महिला क्रिकेट संघाचे अध्यक्ष डॉ. महांतेश जी. के., प्रशिक्षिका शिखा शेट्टी यांच्यासह दिव्यांगांच्या संस्थांचे प्रतिनिधी मोठ्या संख्येने उपस्थित होते.

“केवळ विश्वचषक नाही, तर करोडो भारतीयांचे हृदय जिंकले!”

यावेळी बोलताना राज्यपाल म्हणाले की, “हा माहितीपट केवळ क्रिकेट संघाच्या विजयाची गाथा नसून दिव्यांग महिला खेळाडूंसमोरील सामाजिक, आर्थिक आव्हाने आणि समानतेच्या संघर्षाचे सजीव चित्रण आहे. अंध महिला क्रिकेटपटूंनी केवळ विश्वचषक जिंकला नाही, तर देशातील करोडो भारतीयांचे हृदय जिंकले आहे.” हा प्रेरणादायी माहितीपट शाळा, महाविद्यालये आणि विद्यापीठांमध्ये दाखवण्याच्या सूचना राज्यपालांनी दिल्या.

हेही वाचा – Gavaskar WC Squad : सुनील गावस्करांनी वर्ल्ड कपसाठी निवडला १५ खेळाडूंचा धक्कादायक संघ! ३ डावात २ शतके ठोकणाऱ्याला दिला डच्चू

दिव्यांग खेळाडूंना रोजगाराच्या संधी देण्याचे आवाहन –

भारतात सामान्य क्रिकेटपटूंना भरपूर मान-सन्मान आणि स्पॉन्सरशिप मिळते, परंतु दिव्यांग खेळाडूंना प्रतिभा असूनही पुरेशी मान्यता मिळत नाही. अनेक अंध महिला खेळाडूंनी गरिबी, कौटुंबिक विरोध आणि शारीरिक आव्हानांवर मात करत हे यश मिळवले आहे. त्यामुळे विद्यापीठांनी त्यांना सरावासाठी क्रीडा सुविधा द्याव्यात, तसेच शासकीय संस्था, कॉर्पोरेट आणि खासगी क्षेत्राने दिव्यांग खेळाडूंना रोजगाराच्या संधी उपलब्ध करून द्याव्यात, असे आवाहन राज्यपालांनी केले.