नागपूर : मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार यांच्या शपथविधीनंतर आता आज राज्य मंत्रिमंडळाचा विस्तार पार पडला आहे. देवेंद्र फडणवीस 3.0 सरकारच्या नव्या मंत्र्यांचा शपथविधीचा कार्यक्रम आज नागपुरात राज भवनात पार पडला. राज्यपाल सी. पी. राधाकृष्णन यांच्याकडून नव्या मंत्र्यांना शपथ देण्यात आली. या सरकारमध्ये शिवसेनेकडून अनेक नवीन चेहऱ्यांना संधी देण्यात आली आहे. यामध्ये कोणाकोणाचा समावेश आहे जाणून घेऊया..

1) संजय शिरसाट
संजय शिरसाट हे उपमुख्यमंत्री एकनाथ शिंदे यांचे निकटवर्तीय मानले जातात. एकनाथ शिंदे यांनी शिवसेनेत बंड केल्यानंतर संजय शिरसाट यांनी अनेकदा माध्यमांसमोर येत एकनाथ शिंदे यांची बाजू खमकेपणाने मांडली. एकनाथ शिंदे मुख्यमंत्री झाल्यानंतर त्यांना पक्षाच्या प्रवक्ता पदाची जबाबदारी देण्यात आली होती. यानंतर संजय शिरसाट सातत्याने आपल्या पक्षाची भूमिका मांडत राहिले. ते विरोधकांच्या प्रत्येक टीकेला उत्तर देत आले. यानंतर आता शिरसाट यांना मंत्रिपदाची अखेर संधी देण्यात आली आहे.

शिरसाट हे 2000 साली संभाजीनगर महापालिकेत नगरसेवक म्हणून पहिल्यांदा निवडून आले होते. त्यानंतर 2001 मध्ये ते सभागृह नेता झाले होते. त्यांना 2009 मध्ये शिवसेनेकडून आमदारकीचं तिकीट मिळालं होतं. तेव्हापासून ते सलग चारवेळा संभाजीनगर पश्चिम विधानसभा मतदारसंघातून आमदार म्हणून निवडून आले आहेत. गेल्या अनेक वर्षांपासून ते मंत्रिपदाच्या प्रतिक्षेत होते. अखेर त्यांची आज इच्छा पूर्ण झाली आहे.

2) भरत गोगावले
भरत गोगावले हे देखील एकनाथ शिंदे यांच्या निकटवर्तीयांपैकी एक नेते आहेत. गेल्या सरकारमध्येच भरत गोगावले हे मंत्रिपदासाठी इच्छुक होते. पण काही कारणस्तव त्यांना मंत्रिपदाची संधी मिळाली नव्हती. गोगावले हे सलग चारवेळा महाड विधानसभा मतदारसंघातून जिंकून आले आहेत. भरत गोगावले यांचा मोठा राजकीय प्रवास आहे. त्यांनी सरपंच म्हणून आपल्या राजकीय प्रवासाला सुरुवात केली आहे. सरपंच ते मंत्री असा त्यांचा प्रवास राहिला आहे.

3) प्रकाश आबिटकर
प्रकाश आबिटकर हे राधानगरी मतदारसंघाचे आमदार आहेत. ते 2014, 2019 आणि 2024 असं सलग तीनवेळा आमदार म्हणून जिंकून आले आहेत.

4) प्रताप सरनाईक
प्रताप सरनाईक हे देखील एकनाथ शिंदे यांचे निकटवर्तीय नेते आहेत. प्रताप सरनाईक हे ठाण्यातील ओवाळा-माजीवाडा मतदारसंघाचे आमदार आहेत. ते चार वेळा आमदार म्हणून निवडून आले आहेत. चारवेळा आमदार झाल्यानंतर त्यांनी आज पहिल्यांदा मंत्रिपदाची शपथ घेतली.

5) आशिष जैस्वाल – राज्यमंत्री
आशिष जैस्वाल यांना पहिल्यांदाच मंत्रिमंडळात संधी मिळाली आहे. त्यांना नव्या सरकारमध्ये राज्यमंत्रीपदाची संधी मिळाली आहे. आशिष जैस्वाल हे 2019 मध्ये रामटेक मतदारसंघातून अपक्ष म्हणून निवडून गेले होते. त्याआधी 2009 मध्ये ते शिवसेनेच्या तिकीटावर जिंकून आले होते. तसेच 2024 च्या विधानसभा निवडणुकीदेखील ते शिवसेनेच्या तिकीटावर जिंकून आले आहेत. त्यांच्यावर खूश होत एकनाथ शिंदे यांनी त्यांना राज्यमंत्रीपदाची संधी दिली आहे.

6) योगेश कदम – राज्यमंत्री
योगेश कदम हे शिवसेनेचे ज्येष्ठ नेते रामदास कदम यांचे चिरंजीव आहेत. योगेश कदम हे 2019 आणि आता 2024 असे सगल दोन वेळा आमदार म्हणून निवडून आले आहेत. त्यांना एकनाथ शिंदे यांच्याकडून राज्य मंत्रिपदाची संधी देण्यात आली आहे.