Satej Patil : महायुती सरकारकडून गोकुळवरती चार शासननियुक्त (स्वीकृत) तज्ज्ञ संचालक नेमण्याच्या निर्णयाला मंत्रिमंडळ बैठकीत मंजूरी देण्यात आली आहे. सरकारने बाहेरून हे चार सदस्य नियुक्त करून त्यांना मतदानाचा अधिकार दिल्यास गोकुळच्या अध्यक्ष निवडीचे चित्र बदलू शकते. (Satej Patil)

राज्य सरकारच्या या निर्णयाच्या पार्श्वभूमीवर सतेज उर्फ बंटी पाटील यांनी संतप्त प्रतिक्रिया व्यक्त केली आहे. जे काही कायदेशीर मार्ग आहेत ते सर्व मी अवलंबणार आहे. मी गप्प बसणार नाही. साडेपाच लाख शेतकऱ्यांनी हा कौल दिलेला आहे. (Satej Patil)

लोकांचा जनाधार नाकारत असाल तर रस्त्यावर उतरायची तयारी मी ठेवलेली आहे, असे सतेज पाटील यांनी म्हटले. ते बुधवारी कोल्हापूरमध्ये प्रसारमाध्यमांशी बोलत होते. पूर्ण बहुमत असून सुद्धा केवळ कोरम पूर्ण करण्यासाठी दोन संचालकांचा पाठिंबा मागत आहेत, हे महायुतीचे हास्यास्पद विधान आहे. (Satej Patil)

तसे असेल तर आमचे महानगरपालिकेत पाच नगरसेवक कमी आहेत. महायुतीने आम्हाला पाठिंबा द्यावा आणि महापौर आमचा करावा, असा खोचक टोला सतेज पाटील यांनी महायुतीला लगावला. गोकुळच्या अध्यक्षपदाच्या निवडीवरून सतेज पाटील यांनी आक्रमक भूमिका घेतल्याने आता कोल्हापूरमधील राजकारण तापण्याची शक्यता आहे. (Satej Patil)

जर मतदारांनी विरोधी पक्षात राहण्याचा कौल आपल्याला दिलाय तर तो तुम्ही स्वीकारला पाहिजे. माझ्या पत्रकाला काहीतरी उत्तर द्यावे म्हणून त्यांनी हे काढले आहे. या पत्रकावर सह्या कोणी करायच्या यावरून सुद्धा महायुतीत वाद झालेला आहे. (Satej Patil)

चार संचालक वाढवून त्यांना मतांचा अधिकार देण्याबाबत कॅबिनेटमध्ये काय निर्णय होणार, त्यावर मी उद्या बोलेन. सत्तेचे सूत्र असेच राहणार नाही, ते सुद्धा 2029 ला बदलणार आहे, त्यावेळी सुद्धा आम्ही सगळं लक्षात ठेऊ, असा इशाराच सतेज पाटील यांनी दिला. (Satej Patil)

एका मताचीही किंमत आहे. अटलबिहारी वाजपेयीसुद्धा पंतप्रधान होते, तेव्हा एका मताने पडले होते. हे त्यांनी लक्षात ठेवावे. आम्हाला खात्री आहे की, महायुतीचे सर्व संचालक 10 तारखेच्या सभेमध्ये उपस्थित राहतील आणि आमचे शशिकांत पाटील चुयेकर गोकुळचे चेअरमन होतील. महायुतीतील हा खेळखंडोबा नेमका कोणासाठी सुरू आहे, असा सवाल सतेज पाटील यांनी उपस्थित केला. (Satej Patil)

राज्य सरकारने गोकुळबाबत नेमका काय निर्णय घेतला?

राज्यातील तीन हजार कोटींपेक्षा हजार जास्त उलाढाल असलेल्या सहकारी संस्थांवर मतदानाच्या अधिकारासह थेट शासन नियुक्त्त संचालक नेमणुकीचा प्रस्ताव मंत्रिमंडळ बैठकीत मंजूर करण्यात आला. (Satej Patil)

मंत्रिमंडळातील मंजूर प्रस्तावावर राज्यपालांची सही झाल्यानंतर रीतसर अध्यादेश निघेल. राज्यपालांची सही झाल्यानंतर अध्यादेशाला कायदेशीर स्वरूप प्राप्त होईल. येत्या हिवाळी अधिदेशनात अध्यादेशाचे विधेयकात रूपांतर होईल. दरम्यानच्या काळात गोकुळसह राज्यातील संबंधित सहकारी संस्थांवर शासन नियुक्त संचालकांच्या नेमणुका होणार असल्याची माहिती आहे. (Satej Patil)

सध्या गोकुळमध्ये सतेज (बंटी) पाटील यांच्या गटाचे बहुमत आहे. गोकुळ दूध संघाच्या निवडणुकीत एकूण 25 जागांपैकी 13 जागांवर सतेज पाटील यांच्या नेतृत्त्वाखालील समविचारी आघाडीचे संचालक निवडून आले होते. तर महायुतीच्या पॅनलचे 12 संचालक निवडून आले होते. मात्र, कोरम पूर्ण करण्यासाठी 14 संचालकांच्या बहुमताची गरज असते. (Satej Patil)

त्यामुळे राज्य सरकारने बाहेरून हे ४ सदस्य नियुक्त करून त्यांना मतदानाचा अधिकार दिल्यास गोकुळच्या अध्यक्ष निवडीचे चित्र बदलू शकते. या निर्णयाला महाविकास आघाडी (विशेषतः सतेज पाटील) यांच्याकडून तीव्र विरोध करण्यात आला आहे. ही लोकशाहीची गळचेपी असल्याची टीका त्यांनी केली होती. (Satej Patil)