Maharashtra ATS : महाराष्ट्र दहशतवादविरोधी पथकाने (एटीएस) आंतरराज्यीय (Maharashtra ATS) अमली पदार्थ तस्करीचे एक जाळे उघड केले आहे. एटीएसने मुंबई आणि ग्रेटर नोएडा येथून दोन परदेशी महिलांसह तिघांकडून ४.७३८ किलो मेथॅम्फेटामाइन (मेथ) हा अमली पदार्थ जप्त केला असून, त्याची किंमत ९ कोटी रुपयांपेक्षा जास्त आहे.

मिळालेल्या माहितीच्या आधारे, एटीएसच्या (Maharashtra ATS) काळाचौकी युनिटने मंगळवारी वांद्रे येथे एका संशयिताला अडवले आणि त्याच्याकडून २.०५० किलो मेथ जप्त केले. या अमली पदार्थाची किंमत सुमारे ४ कोटी रुपये आहे.

त्याची कसून चौकशी केल्यानंतर एटीएसला ग्रेटर नोएडामधील अमली पदार्थ निर्मिती केंद्राचा सुगावा लागला. त्यानंतर, दोन परदेशी महिलांना ताब्यात घेण्यात आले आणि त्यांच्याकडून २.६८८ किलो मेथ (किंमत सुमारे ५.४० कोटी रुपये) जप्त करण्यात आले.

एटीएसने (Maharashtra ATS) या कृत्रिम अमली पदार्थाच्या निर्मितीसाठी वापरले जाणारे साहित्यही जप्त केले आणि ग्रेटर नोएडामधील संबंधित जागा सील केली. तिन्ही आरोपींवर कायद्याच्या संबंधित कलमांखाली गुन्हे दाखल करण्यात आले असून पुढील तपास सुरू आहे. या कारवाईचा तपशील, तसेच अटक करण्यात आलेल्या महिलांची राष्ट्रीयत्व यांबाबतची माहिती अद्याप उघड करण्यात आलेली नाही.