Maharashtra Assembly Election 2024 : विधानसभा निवडणुकीच्या प्रचाराचा आज शेवटचा दिवस असून सर्वच राजकीय पक्ष अगदी जोमाने आज प्रचारासाठी मैदानात उतरले आहेत. सभा, दौरे, रोड शो, बैठकांबरोबरच सोशल मीडियावरही सर्वच पक्षांचा डिजीटल प्रचार जोरात सुरु आहे.

यंदाची निवडणूक महाराष्ट्राच्या राजकारणाला कलाटणी देणारी ठरणार असली तरी, काही मतदार असे आहेत की ते आपल्या मतदानापासून वंचित राहिले आहेत.

विधानसभा निवडणुकीसाठी जळगाव तहसील कार्यालयात ११ मतदारसंघांचे मतदान होत आहे. तीन दिवसांत पोलिसांचे केवळ ८७० मतदान झाले. बहुतांश कर्मचाऱ्यांची नावे यादीत नसल्याने त्यांना मतदान करता आले नाही.

अशा उमेदवारांना येत्या बुधवारी (ता. २०) मतदान करता येणार असल्याचे प्रशासनाने जाहीर केले. मात्र, त्यादिवशी ड्यूटी असल्याने या कर्मचाऱ्यांवर मतदानापासून वंचित राहण्याची वेळ आली आहे.

मंगळवारी (ता. १९) प्रशासन व पोलिस दल मतदान केंद्रांवर पोचतील. त्यामुळे पोलिसांसह अधिकारी व कर्मचाऱ्यांचे अगोदर टपाली मतदान होत आहे. जळगाव तहसील कार्यालयात तीन दिवस मतदान झाले. बहुतांश पोलिसांची नावे याद्यांत सापडली नाहीत.

मात्र, ज्या कर्मचाऱ्यांची नावे यादीत नसतील, त्यांना त्या-त्या मतदारसंघांत सामान्य मतदारांप्रमाणे मतदान करता येईल. असं जळगाव विभागाच्या तहसीलदार शीतल राजपूत यांनी सांगितलं आहे. त्यामुळे ज्यांची नावे एनेक्चरमध्ये नाहीत त्यांना सुद्धा मतदानाचा हक्क बाजवता येणार आहे.