Mahalunge Police – चोरीचा नेमका कालावधी निश्चित नसताना आणि तपासाचे कोणतेही थेट धागेदोरे हाती नसताना, महाळुंगे एमआयडीसी पोलिसांच्या तपास पथकाने अत्यंत कौतुकास्पद कामगिरी केली आहे. तांत्रिक पुराव्यांच्या आधारे तब्बल ६०० जीबी पेक्षा जास्त सीसीटीव्ही फुटेजची पडताळणी करत पोलिसांनी ३६ लाख रुपयांच्या चोरीचा छडा लावला.

या प्रकरणी कंपनीच्याच एका माजी विश्वासू कामगारासह चोरीचा माल खरेदी-विक्री करणाऱ्या ६ आरोपींना अटक करण्यात आली असून, सर्व १० बीअर स्टोअरेज टँक जप्त करण्यात आले आहेत. सावरदरी (ता. खेड) येथील औद्योगिक परिसरात ‘टाईने रिबेल’ या नवीन बीअर कंपनीचे काम सुरू आहे. या कंपनीमधून ३६ लाख रुपये किमतीच्या १० स्टीलच्या बीअर स्टोअरेज टाक्या २० फेब्रुवारी ते ३० मार्च या कालावधीत अज्ञात चोरट्यांनी लंपास केल्या होत्या.

फिर्यादी विवेक मारुती खैरे यांना या चोरीबाबत तब्बल ४० दिवसांनंतर माहिती मिळाली. गुन्ह्याचे गांभीर्य ओळखून पोलीस उप-आयुक्त (परिमंडळ ४) श्वेता खेडकर यांनी स्वतः घटनास्थळाला भेट देऊन तपासाचे मार्गदर्शन केले. वरिष्ठ पोलीस निरीक्षक दिगंबर सूर्यवंशी व सहाय्यक पोलीस निरीक्षक कल्याण घाडगे यांच्या पथकाने परिसरातील ३५ कंपन्यांचे दीड महिन्यांचे सीसीटीव्ही फुटेज तपासले.

यातून पोलिसांना एक संशयित क्रेन आणि ट्रक आढळून आला. तांत्रिक तपासादरम्यान, कंपनीचा माजी विश्वासू कामगार प्रसाद राजळे याचे क्रेन व ट्रक चालकाशी संशयास्पद संबंध असल्याचे समोर आले. पोलिसांनी राजळेला ताब्यात घेऊन कसून चौकशी केली असता, त्यानेच हा चोरीचा कट रचल्याची कबुली दिली. मुख्य आरोपीने दिलेल्या माहितीवरून पोलिसांनी चोरीच्या टाक्या वाहून नेणारे आणि त्या खरेदी करणारे इतर ५ आरोपी अशा एकूण ६ जणांना अटक केली.

तसेच कुदळवाडी (चिखली, पुणे) आणि मुंब्रा (ठाणे) येथून ३६ लाख रुपयांच्या सर्व १० टाक्या जप्त करण्यात आल्या आहेत. याप्रकरणात अटक केलेले आरोपींमध्ये प्रसाद विनोद राजळे (वय २९, रा. पिरंगुट, मुळशी – मुख्य सूत्रधार), किसनकुमार सुभाषचंद्र गुप्ता, चंदन अर्जुन सिंग आणि अली अहमद चौधरी (तिघेही रा. कुदळवाडी, चिखली), फिरोज असगर अली खान ( रा. मोशी, हवेली), नियाज मोहम्मद इसराईल (रा. मुंब्रा, ठाणे) नावे आहेत.

सदर कारवाई पिंपरी-चिंचवडचे पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त सारंग आवाड, बसवराज तेली, उपायुक्त श्वेता खेडकर, सहायक आयुक्त सचिन कदम यांच्या मार्गदर्शनाखाली वरिष्ठ पोलीस निरीक्षक दिगंबर सूर्यवंशी, सहायक पोलिस निरिक्षक कल्याण घाडगे, साहिल सांडभोर, मंगेश घोलप आणि समीर महत यांच्या पथकाने केली.