MS Dhoni 100 Crore-Defamation Case : मद्रास उच्च न्यायालयाने एमएस धोनीच्या 100 कोटींच्या मानहानी खटल्याची सुनावणी सुरू करण्याचे आदेश दिले आहेत. हा खटला आयपीएल सट्टेबाजी घोटाळ्यात धोनीचे नाव खराब केल्याप्रकरणी आहे. धोनीची साक्ष घेण्यासाठी ॲडव्होकेट कमिशनर नियुक्त केले आहे.

काय आहे प्रकरण?

सोमवारी न्या. सी.व्ही. कार्तिकेयन यांनी धोनी यांच्या वकिलाने सादर केलेले शपथपत्र नोंदवताना 20 ऑक्टोबर ते 10 डिसेंबर 2025 या कालावधीत चेन्नईत साक्ष नोंदवण्यासाठी ॲडव्होकेट कमिशनर नियुक्त केले. हे कमिशनर न्यायालयाच्या यादीतून निवडले जाईल. एमएस धोनीने 2014 मध्ये झी मीडिया कॉर्पोरेशन, पत्रकार सुधीर चौधरी, निवृत्त पोलीस अधिकारी जी. संपत कुमार आणि न्यूज नेशन नेटवर्क यांच्याविरुद्ध आयपीएल सट्टेबाजी घोटाळ्यात नाव खराब केल्याप्रकरणी मानहानीचा खटला दाखल केला होता.

न्या. कार्तिकेयन यांनी ॲडव्होकेट कमिशनरला चेन्नईत सर्व पक्षकार आणि त्यांच्या वकिलांसमोर धोनीची साक्ष नोंदवण्याचे आदेश दिले. धोनीच्या सेलिब्रिटी व्यक्तिमत्त्वामुळे त्याच्या प्रत्यक्ष उपस्थितीत साक्ष नोंदवताना गोंधळ होण्याची शक्यता लक्षात घेऊन ॲडव्होकेट कमिशनरची नियुक्ती करण्यात आली आहे. धोनीने वरिष्ठ वकील पी.आर. रमन यांच्यामार्फत शपथपत्र सादर केले, ज्यात त्यांनी 2014 पासून प्रलंबित असलेला हा खटला पुढे नेण्याची इच्छा व्यक्त केली.

हेही वाचा – MS Dhoni : ‘सर, तुम्हाला खेळावेच लागेल…!’, IPL 2026 खेळण्याबद्दल चाहत्याच्या प्रश्नावर धोनीने काय दिले उत्तर? पाहा VIDEO

शपथपत्रात धोनीने म्हटले की, तो 20 ऑक्टोबर ते 10 डिसेंबर 2025 या कालावधीत साक्ष आणि चाचणी जिरहासाठी उपलब्ध असेल. स्थान आणि तारखा परस्पर सोयीनुसार ठरवता येतील. तसेच, खटला आणि साक्ष नोंदवण्यासंदर्भात न्यायालयाच्या निर्देशांचे पालन करून पूर्ण सहकार्य करण्याचे आश्वासन त्यानी दिले. साक्षी नोंदणी पूर्ण झाल्यानंतर पुढील सुनावणीसाठी खटला सूचीबद्ध करण्यात आला आहे.