LPG Price Hike : देशातील 5 राज्यांमध्ये काल विधानसभा निवडणुका पूर्ण झाल्या असून आजपासून एलपीजी सिलिंडरच्या किमती वाढल्या आहेत. ही वाढ 19 किलोच्या व्यावसायिक गॅस सिलिंडरवर झाली असून त्याचा दर प्रति सिलेंडर 21 रुपयांनी वाढला आहे. आजपासून, 1 डिसेंबर 2023 पासून, व्यावसायिक गॅस सिलेंडरसाठी 1796.50 रुपये मोजावे लागतील, तर गेल्या महिन्यात एलपीजी गॅसची किंमत प्रति सिलेंडर 1775.50 रुपये होती. दरम्यान, घरगुती एलपीजी सिलिंडरच्या किमतीत कोणताही बदल करण्यात आलेला नाही. सामान्य एलपीजी सिलिंडर ग्राहकांना कोणताही दिलासा मिळालेला नाही किंवा त्यांच्या गॅस सिलिंडरच्या दरात कोणताही बदल करण्यात आलेला नाही. यापूर्वी १६ नोव्हेंबरला व्यावसायिक एलपीजीच्या किमती ५७ रुपयांनी कमी झाल्या होत्या. येत्या ३ डिसेंबर रोजी पाच राज्यांच्या निवडणुकांचा शेवटचा टप्पा म्हणजेच मतमोजणी व निकाल असणार आहे. यापूर्वी ऑक्टोबरमध्ये, ओएमसीने व्यावसायिक एलपीजीच्या किमती २०९ रुपयांनी वाढवल्या होत्या, आणि त्याआधी सप्टेंबरमध्ये १५८ रुपयांची कपात केली होती. इस्त्रायल-हमास युद्धामुळे उद्भवलेल्या स्थितीमुळे कच्च्या तेलाच्या किमतींमध्ये वाढ झाली होती परिणामी आता व्यायसायिक सिलिंडरचे भाव सुद्धा वधारले आहेत. गेल्या महिन्याच्या पहिल्या तारखेला म्हणजे 1 नोव्हेंबरलाही एलपीजी सिलिंडरच्या किमतीत 100 रुपयांहून अधिक वाढ करण्यात आली होती. एलपीजीच्या या किमती १९ किलोच्या व्यावसायिक गॅस सिलिंडरवर वाढवण्यात आल्या आहेत. देशात १ नोव्हेंबर रोजी करवा चौथचा सण साजरा करण्यात आला आणि या सणासुदीच्या दिवशी महागाईने हैराण झाले होते. 1 ऑक्टोबर रोजी एलपीजी 1731.50 रुपये होता, तर 1 नोव्हेंबरला त्याचा दर 101.50 रुपयांनी महागला आणि तो 1833 रुपये प्रति सिलेंडर झाला. यानंतर, 16 नोव्हेंबर रोजी, व्यावसायिक गॅसची किंमत कमी करण्यात आली आणि तो 57.05 रुपयांनी स्वस्त झाला आणि 1775.50 रुपयांवर आला.
