LPG Crisis Satara – युद्धाचा परिणाम आता जिल्ह्यात जाणवू लागला आहे. व्यावसायिक सिलिंडरची टंचाई निर्माण झाल्याने हॉटेल व्यवसायासह, केटरिंग व्यवसायिक अडचणीत आले आहेत. यामुळे अनेकांची लग्ने लांबणीवर पडली आहेत. घरगुती गॅस सिलिंडरचा पुरवठा सुरळीत असताना अफवा पसरल्याने गॅस सिलिंडर खरेदीसाठी एजन्सीच्या बाहेर रांगा लागल्या आहेत. जिल्ह्यात व शहरात घरगुती गॅसचा पुरवठा दोन-तीन दिवसांच्या अंतराने मात्र सुरळीत आहे. व्यावसायिक गॅस सिलिंडरची मात्र तीव्र टंचाई आहे. विक्रेते सिलिंडर उपलब्ध होतील, त्याप्रमाणे पुरवठा करण्याचा प्रयत्न करत आहेत. मात्र, पुरवठा अपुरा पडत आहे. यामुळे हॉटेल, रेस्टॉरंट आणि औद्योगिक वापरातील (इंडस्ट्रियल) गॅस सिलिंडरचा तुटवडा जाणवत आहे. औद्योगिक पुरवठा मात्र पूर्णपणे बंद करण्यात आला आहे. त्यामुळे व्यवसायिकांचे धाबे दणाणले आहेत. छोटे-मोठे व्यवसाय जे गॅस संबंधित आहेत. तेही आता अडचणीत येऊ लागले आहेत. परिणामी कामगारांच्या रोजगारावर गदा येण्याची शक्यता वाढू लागली आहे. ही परिस्थिती दिवसेंदिवस गंभीर होऊ लागल्याने गॅसचा पुरवठा तत्काळ करावा, अशी उद्योजकांनी मागणी सुरु केली आहे. व्यवसाय बंद पडण्याची शक्यता शासनाने अत्यावश्यक वस्तू कायदा लागू केल्यानंतरही हॉटेल, रेस्टॉरंट आणि खाद्य पदार्थ उद्योगांना मिळणारा व्यावसायिक गॅस पुरवठा विस्कळीत आहे. परिणामी शहरातील छोटे-मोठे उद्योग अडचणीत सापडले असून येत्या दोन दिवसांत साता-यातील चौपाटी, हॉटेल, बेकरी आणि खाद्य व्यवसाय बंद पडण्याची शक्यता व्यक्त होत आहे. बुक केलेल्या तारखा रद्द केल्या घरगुती आणि व्यावसायिक व औद्योगिक सिलिंडरचा तुटवडा आहे. गॅसच उपलब्ध नसल्याने केटरर्स व्यवसायही आता अडचणीत येण्याचे संकेत मिळू लागले आहेत. त्यावेळी कामगार टिकवणे आणि त्यांचे पगार कसे करायचे हा प्रश्न आहेच. हॉटेलनंतर केटरिंग व्यवसायिकही अडचणीत आला आहे. गॅस सिलिंडर नसल्याने लग्न सराईत घेतलेल्या ऑर्डर रद्द करण्यात येत आहेत. काही केटरिंग तर बंद ठेवण्यात आले आहेत. यामुळे अनेकांची लग्न लांबणीवर पडली आहेत. अनेकांनी बुक केलेल्या तारखा रद्द केल्या आहेत.
