Zeenat Aman: बॉलिवूडमधील ज्येष्ठ अभिनेत्री जीनत अमान या नेहमीच त्यांच्या स्पष्टवक्तेपणासाठी आणि वेगळ्या विचारांसाठी ओळखल्या जातात. नाती, लग्न, महिलांचे स्वातंत्र्य आणि वैयक्तिक आयुष्य यांसारख्या विषयांवर त्या नेहमीच खुलेपणाने आपले मत मांडताना दिसतात. नुकत्याच एका चर्चित मुलाखतीत त्यांनी लिव-इन रिलेशनशिप, लग्न आणि नात्यांबद्दल आपली भूमिका स्पष्ट केली आहे.   (Zeenat Aman)

एका चॅट शोदरम्यान सिमी ग्रेवाल यांनी जीनत अमान यांना त्यांच्या वैयक्तिक आयुष्याबद्दल आणि पुन्हा लग्न करण्याबाबत प्रश्न विचारला. त्यावेळी जीनत अमान यांनी सांगितले की, त्यांना पुन्हा लग्न करण्याची इच्छा नाही. त्या म्हणाल्या की, एखादा व्यक्ती लग्न न करताही कोणासोबत मजबूत आणि सुंदर नातं टिकवू शकतो.

जीनत अमान यांच्या मते, कोणतेही नाते केवळ लग्नाच्या कागदांवर टिकत नाही. दोन व्यक्तींमध्ये असलेला सन्मान, समजूतदारपणा आणि आपुलकी हेच नात्याचे खरे आधार असतात. त्या म्हणाल्या की, “जेव्हा दोन व्यक्ती स्वतःच्या इच्छेने एकत्र राहतात आणि एकमेकांना समजून घेतात, तेव्हा ते नाते अधिक प्रामाणिक आणि मजबूत असते.”

त्यांनी पुढे सांगितले की, नात्यांमध्ये जबरदस्ती नसून मोकळेपणा आणि विश्वास असणे महत्त्वाचे आहे. समाजाने ठरवलेल्या नियमांपेक्षा दोन व्यक्तींमधील भावनिक नातं अधिक महत्त्वाचं असतं, असेही त्यांनी नमूद केले.  (Zeenat Aman)

या मुलाखतीदरम्यान जीनत अमान यांनी त्यांच्या आयुष्यातील काही कठीण प्रसंगांचाही उल्लेख केला. त्यांनी सांगितले की, त्यांच्या आईचे निधन झाले आणि पती मजहर खान यांचेही निधन झाले. या अनुभवांमुळे त्यांना आयुष्याची खरी जाणीव झाली. त्या म्हणाल्या की, “या जगात काहीही कायमस्वरूपी नसते. मग प्रत्येक नातं कायमच टिकेल, अशी अपेक्षा आपण का ठेवतो?”  (Zeenat Aman)

जीनत अमान यांनी मुलांबाबतही मत व्यक्त केले. त्यांनी सांगितले की, मुलं मोठी झाल्यानंतर स्वतःचे निर्णय घेत पुढे जातात. त्यामुळे प्रत्येक व्यक्तीने स्वतःसोबत आनंदी राहायला शिकणे खूप गरजेचे आहे. एखादी व्यक्ती स्वतःसोबत समाधानी असेल, तर ती आयुष्यातील कोणतीही परिस्थिती अधिक चांगल्या प्रकारे हाताळू शकते.

त्यांच्या या विचारांची सोशल मीडियावर मोठ्या प्रमाणात चर्चा होत आहे. काहींनी त्यांच्या स्पष्ट मतांचे कौतुक केले, तर काहींनी पारंपरिक नातेसंबंधांबाबत वेगवेगळ्या प्रतिक्रिया दिल्या. मात्र, नात्यांमध्ये प्रामाणिकपणा, सन्मान आणि समजूतदारपणा महत्त्वाचा असल्याचा संदेश त्यांच्या वक्तव्यातून स्पष्टपणे दिसून आला.