Loni Kalbhor Accident – पुणे-सोलापूर महामार्गावरील एमआयटी कॉर्नर (कदमवाकवस्ती) येथे भरधाव पिकअप गाडी उलटल्याने झालेल्या अपघातात, बंदोबस्तावर तैनात असलेले गृहरक्षक दलाचे (होमगार्ड) दोन जवान जखमी झाले आहेत. शुक्रवारी सायंकाळी साडेसहाच्या सुमारास ही घटना घडली. याप्रकरणी निष्काळजीपणे वाहन चालवल्याबद्दल पिकअप चालकाविरुद्ध लोणी काळभोर पोलीस ठाण्यात गुन्हा दाखल करण्यात आला आहे. अनिल तानाजी बनकर (रा. हडपसर, पुणे; मूळ रा. वेळापूर, ता. माळशिरस) असे गुन्हा दाखल झालेल्या चालकाचे नाव आहे. याप्रकरणी पोलीस हवालदार सर्जेराव दडस यांनी सरकारतर्फे फिर्याद दिली आहे. मिळालेल्या माहितीनुसार, एमआयटी कॉर्नर येथे वाहतूक नियमन करण्यासाठी पोलीस कर्मचारी व होमगार्डचे जवान तैनात होते. दरम्यान, सोलापूरकडून पुण्याकडे जाणारी महिंद्रा पिकअप गाडी अत्यंत वेगात येत होती. चौकात आल्यावर चालकाने अचानक जोरात ब्रेक मारल्याने गाडीवरील ताबा सुटला आणि पिकअप पलटी झाली. पलटी झालेली ही गाडी घासत जाऊन बंदोबस्ताच्या ठिकाणी उभी असलेली पोलीस चौकी आणि समोरून जाणाऱ्या एका कारला पाठीमागून जोरात धडकली. या धडकेत कारचे मोठ्या प्रमाणावर नुकसान झाले आहे. अपघाताच्या वेळी तेथे उपस्थित असलेले होमगार्ड अतुल कारंजकर आणि विजय शिंदे हे दोघे किरकोळ जखमी झाले. त्यांना तातडीने खासगी रुग्णवाहिकेद्वारे उपचारासाठी रुग्णालयात हलवण्यात आले. पोलिसांनी पिकअप चालक अनिल बनकर याला ताब्यात घेतले असून, त्याची वैद्यकीय तपासणी करण्यासाठी ससून रुग्णालयात पाठवले आहे. हयगयीने आणि बेदरकारपणे वाहन चालवून इतरांच्या जिवितास धोका निर्माण केल्याचे फिर्यादीत नमूद आहे. लोणी काळभोर पोलीस या प्रकरणाचा पुढील तपास करत आहेत.
