रायबरेली – भारतीय जनता पार्टीने रायबरेली मतदार संघात दिनेश प्रताप सिंह यांना उमेदवारी दिली आहे. मात्र दिनेश प्रताप यांच्या विरोधात भाजपच्याच काही गटांमध्ये नाराजी आहे. त्यामुळे त्यांचे आणि भाजपसमोरचे आव्हान वाढले आहे. भाजपच्या असंतुष्ट आमदार अदिती सिंह आणि समाजवादी पक्षाचे बंडखोर आमदार मनोज पांडे हे दिनेश प्रताप सिंह यांच्या प्रचारापासून अंतर राखून आहेत.

भाजपला रायबरेलीत जोरदार प्रचार अभियान राबवायचे आहे. मात्र या दोन नेत्यांच्या नाराजीमुळे भाजपला काहीसे गोंधळात टाकले आहे. आपल्या रायबरेली दौऱ्यात अमित शहा यांनी या दोन्ही नेत्यांची नाराजी दूर करण्याचा प्रयत्न केला. तथापि, त्यांना त्यात यश आले नाही.

विशेष म्हणजे मनोज पांडे हे समाजवादी पक्षाचे आमदार असूनही त्यांनी राज्यसभेच्या निवडणुकीत भारतीय जनता पार्टीच्या उमेदवाराला पाठिंबा दिला होता. मात्र आता रायबरेलीत दिनेश प्रताप सिंह यांचे समर्थन करण्याची त्यांची इच्छा नाही. तुम्ही आता भाजपच्या उमेदवाराचे समर्थन करा, योग्य वेळी पक्षाकडून तुम्हाला याचे बक्षीस दिले जाईल असा शब्द शहा यांनी पांडे यांना दिला आहे असे समजते.

मनोज पांडे हे ब्राह्मण चेहरा आहेत. रायबरेली लोकसभा मतदार संघातून ऊंचाहार विधानसभेतून ते तीन वेळा आमदार झाले आहेत. समाजवादी पक्षात ते प्रमुख ब्राह्मण चेहरा म्हणून ओळखले जात होते. २४ फेब्रुवारी २०२४ रोजी त्यांनी समाजवादी पक्षातील आपल्या महत्वाच्या पदांचा राजीनामा दिला आहे. सूत्रांच्या म्हणण्यानुसार पांडे यांना स्वत:ला रायबरेली येथून उमेदवारी हवी होती. मात्र त्यांन डावलण्यात आल्यामुळे ते नाराज आहेत.