कोयनानगर (प्रतिनिधी) :- कोयना धरणात पाण्याचा खडखडाट झाला आहे.कोयना धरणात केवळ 13 टक्के पाणीसाठा शिल्लक राहिला आहे. धरणातील पाण्याची जागा गाळाने घेतली असून गाळमिश्रित पाणीसाठा आहे. धरणातील पाणीसाठा पूर्वेकडील सिंचन प्रकल्पासाठी आरक्षित केला असून धरणातून पूर्वेकडील सिंचन प्रकल्पासाठी 2620 कुसेक पाणीसाठा देण्यात येत असून केवळ 6 दिवसांत पश्‍चिमेकडील वीज प्रकल्पासाठी महानिर्मिती कंपनीने धरणातून 2.5 टीएमसी पाण्याचा वापर करून पाणीसाठा संपवल्यामुळे धरणात पाण्याची आणीबाणी सुरु आहे. त्यामुळे वीजनिर्मितीसाठी धरणातील पाण्याचा वापर कमी करावा, असे लेखी पत्र कोयना प्रकल्पाने महानिर्मिती कंपनीला दिल्यामुळे कोयनेच्या वीजेवर मर्यादा येण्याची शक्‍यता आहे.

105.25 टीएमसी पाणीसाठवण क्षमता असणाऱ्या कोयना धरणात सध्या 13. 75 टीएमसी पाणीसाठा आहे. धरणातील पाणीसाठ्याचे वाटप कृष्णा तंटा पाणी वाटप लवादाच्या निर्देशाप्रमाणे केले जाते. पाणी वाटपाचे तांत्रिक वर्ष 1 जूनपासून सुरू झाले आहे. या तांत्रिक वर्षात पश्‍चिमेकडील वीज प्रकल्पासाठी 67.50 टीएमसी पाणीसाठा आरक्षित झाल्यामुळे पहिल्या 6 दिवसांतच महानिर्मिती कंपनीने 2.5 टीएमसी पाण्याचा वापर करून धरणात पाण्याचा खडखडाट केला आहे.

धरणातील पाणीसाठा पूर्वेकडील सिंचन प्रकल्पासाठी आरक्षित केल्यामुळे धरणातील पाण्यावरून सिंचन व वीज प्रकल्पात मारामारी चालली आहे. कोयना प्रकल्पाने महानिर्मिती कंपनीला वीजनिर्मितीसाठी कमी प्रमाणात पाणीसाठा वापरावा, असे लेखी पत्र महानिर्मिती कंपनीला दिले असल्याची माहिती कोयना प्रकल्पाचे कार्यकारी अभियंता नितीश पोतदार यांनी दिली.

नाममात्र वीजनिर्मिती करणार

कोयना प्रकल्पाने महानिर्मिती कंपनीला वीजनिर्मितीसाठी कमी पाणी वापराचे निर्देश दिल्यामुळे पश्‍चिमेकडील वीज प्रकल्पातून नाममात्र वीजनिर्मिती करणार असल्याचे कोयना जलविद्युत प्रकल्पाचे व महानिर्मिती कंपनीचे मुख्य अभियंता संजय चोपडे यांनी स्पष्ट केले आहे. केवळ वीज मागणी काळात वीजनिर्मिती करण्यावर आम्ही भर देणार असल्याचे त्यांनी स्पष्ट केले.