पेठ – पुणे बंगलुरु महामार्गावर कराड-कोल्हापूर दरम्यान कामेरीजवळील (ता. वाळवा) वेदांतिका मंगल कार्यालयासमोर शुक्रवारी रात्री आठ वाजण्याच्या सुमारास अज्ञात वाहनाच्या धडकेत गंभीर जखमी झालेल्या एका ३ ते ४ वर्षे वयाच्या बिबट मादीचा उपचारासाठी नेत असताना मृत्यू झाला.

मिळालेल्या माहितीनुसार, प्रदीप विलास जाधव व संग्रामसिंह खासेराव पाटील पाटील यांनी बिबट जखमी अवस्थेत पडल्याची माहिती वन विभागाला दिली. माहिती मिळताच वन विभागाचे अधिकारी व कर्मचारी यांनी घटनास्थळी धाव घेतली. त्यावेळी महामार्गावर मादी बिबट्याच्या पुढील पायांना गंभीर दुखापत होऊन रक्तस्राव झाल्याचे दिसले. त्यानंतर जखमी बिबट मादीला रेस्क्यू टीमने ताब्यात घेऊन उपचारासाठी रेस्क्यू व्हॅनमध्ये हलवत असताना तिचा मृत्यू झाला.

वन विभागाची तात्काळ कारवाई

सांगलीचे उप वनसंरक्षक धैर्यशील पाटील, सहाय्यक वनसंरक्षक नवनाथ कांबळे , शिराळ्याचे वनक्षेत्रपाल रमेश कोबळे , मानद वन्यजीव रक्षक विशाल पाटील यांच्या मार्गदर्शनाखाली वनपाल इस्लामपूर डी. बी. बर्गे, वनरक्षक अमोल माळी, वनरक्षक भवानीनगर अमोल साठे, वनमजूर आणि रेस्क्यू टिममधील गौरव गायकवाड, प्रथमेश पोळ , पांडुरंग उगळे , भिवा कोळेकर यांनी घटनास्थळाचा पंचनामा केला.

मृत बिबट मादीचा मृतदेह दत्त टेकडी ईश्वरपूर येथील वन विभागाच्या कार्यालयात शवविच्छेदनासाठी पाठवण्यात आला असून पुढील तपास वन विभाग करत आहे.

हेही वाचा: 

Ganeshotsav 2026: बाप्पाच्या स्वागतासाठी बोहरीआळी फुलली! रेडीमेड अन् थीमबेस्ड मखरांना गणेशभक्तांची पसंती