हिंगोली : मागच्या काही महिन्यांपासून काँग्रेस पक्षाला गळती लागली आहे. ही गळती काय थांबायचे नाव घेईना. कॉग्रेसमध्ये नवी बांधणी करणारे दमदार नेते अशी दिवंगत राजीव सातव यांची ओळख होती. पण त्यांच्या निधनानंतर कळमनुरीसह हिंगोली जिल्ह्यातील कॉग्रेस शक्तीहिन झाल्याचे सध्या पाहायला मिळत आहे. सातव यांच्या पश्चात त्यांच्या पत्नीस कॉग्रेसने आमदार केल्यानंतर जिल्ह्यातील कॉग्रेसमधील अंतर्गत धुसफुस समोर आली.

दिवंगत खासदार राजी सातव व माजी आमदार भाऊ पाटील गोरेगावकर यांच्यात सुरुवाती पासूनच गटबाजी होती. 2019 विधानसभेच्या निवडणुकीत भाऊ गोरेगावकर यांना उमेदवारी मिळू नये म्हणून सातव यांनी अप्रत्यक्ष जोरदार प्रयत्न केले होते. राजीव सातव यांच्या निधनानंतर त्यांच्या जागी आमदार प्रज्ञा सातव यांचा कार्यकाळ सुरू झाला. त्यांचे व भाऊ पाटील गोरेगावकर यांच्यातही बेबनाव कायम राहिला. माणिकराव ठाकरे यांनी मध्यस्थी करून दोघांमध्ये मनोमिलन घडवून आणले होते पण त्याचा काही फारसा उपयोग झाला नाही.

‘या’ नेत्यांनी सोडली साथ
राजीव सातव यांच्या निधनानंतर प्रज्ञा सातव यांच्याकडे पक्षाची सूत्र आली.मात्र त्यांच्यावर एककल्ली स्वभावावर टीका करुन कॉग्रेस जिल्हाध्यक्ष संजय बोंढारे यांनी पक्ष सदस्यत्वाचा राजीनामा दिला आणि ते शिंदेच्या शिवसेनेत सामील झाले. त्यानंतर माजी आमदार डॉक्टर संतोष टारफे, तालुकाध्यक्ष धनंजय पाटील, जिल्हा परिषदेचे माजी सदस्य बाळासाहेब मगर, केशव नाईक, कैलास सोळंके, एस. टी राठोड, पंचायत समितीचे माजी सभापती जनार्दन पतंगे,कळमनुरीचे माजी नगराध्यक्ष नंदकुमार तोष्णीवाल यांनीदेखील शिंदेच्या शिवसेनेत प्रवेश केला.

‘हा’ नेता सोडणार काँग्रेसची साथ
यानंतर आता माजी आमदार भाऊ पाटील गोरेगावकर हे काँग्रेसची साथ सोडणार आहेत. त्यांच्या बरोबर अनेक कार्यकर्ते शिवसेना (एकनाथ शिंदे ) यांच्या पक्षात प्रवेश करणार आहेत. 19 मार्च रोजी हा पक्ष प्रवेश सोहळा पार पडणार आहे.