Kudalwadi Encroachment Drive – पिंपरी-चिंचवड महापालिकेने सोमवारी पहाटे कुदळवाडी आणि जाधववाडी परिसरात अतिक्रमणांविरोधात मोठी धडक कारवाई करत ५ अनधिकृत धार्मिक स्थळांसह हजारो चौरस फुटांवरील पत्राशेड आणि आरसीसी बांधकामे जमीनदोस्त केली. अत्यंत गोपनीयपणे राबविण्यात आलेल्या या मोहिमेमुळे परिसरात एकच खळबळ उडाली. कारवाईदरम्यान काही संतप्त नागरिकांनी तीव्र विरोध केल्याची चर्चा आहे. कारवाईमुळे तणावाचे वातावरण निर्माण झाले होते. मात्र, मोठ्या पोलीस बंदोबस्तामुळे परिस्थिती नियंत्रणात ठेवण्यात प्रशासनाला यश आले. यापूर्वी देखील फेब्रुवारी २०२५ मध्ये महापालिका प्रशासनाने खूप मोठ्या प्रमाणावर अतिक्रमण विरोधी कारवाई घेत हजारो अनिधकृत बांधकामे जमीनदोस्त केली होती. महापालिकेच्या ‘क’ क्षेत्रीय कार्यालयांतर्गत चिखली, कुदळवाडी आणि जाधववाडी परिसरात ही मोहीम राबविण्यात आली. रविवारी दुपारपासूनच प्रशासनाने या कारवाईची तयारी सुरू केली होती. कोणतीही पूर्वकल्पना न देता परिसरात जेसीबी आणि पोकलेन यंत्रणा दाखल करण्यात आली होती. रात्री उशिरापासून पोलिसांनी परिसराचा ताबा घेत कुदळवाडी परिसराकडे जाणारे प्रमुख रस्ते बॅरिकेड्स लावून बंद केले होते. स्थानिकांचा संभाव्य विरोध लक्षात घेऊन पहाटे तीनच्या सुमारास प्रत्यक्ष कारवाईला सुरुवात करण्यात आली. पहाटे पाच वाजेपर्यंत प्रशासनाने अनधिकृत धार्मिक स्थळे हटवण्याची मोहीम पूर्ण केली. कुदळवाडीतील विसावा चौक ते पोलीस चौकी रस्ता परिसरातील पत्राशेड, जाधववाडीतील सावता माळी मंदिर रस्त्यावरील पत्राशेड आणि वीट बांधकाम तसेच गट क्रमांक ६७८ मधील आरसीसी बांधकामांवर बुलडोझर फिरवण्यात आला. डॉ. विजय सूर्यवंशी, आयुक्त, पिंपरी चिंचवड महापालिका कारवाई सुरू असताना काही नागरिकांनी संताप व्यक्त करत महापालिकेच्या दोन जेसीबी मशिनवर दगडफेक केल्याची चर्चा परिसरात होती. मात्र या घटनेला पोलीस आणि महापालिका प्रशासनाने दुजोरा दिला नाही. जमावामुळे परिस्थिती तणावपूर्ण बनत असल्याचे लक्षात येताच पोलिसांनी तातडीने अतिरिक्त फौजफाटा पुढे करत जमावाला पांगवले. काही काळ परिसरात भीती आणि गोंधळाचे वातावरण निर्माण झाले होते. पहाटेच्या शांततेत सुरू झालेल्या या कारवाईने संपूर्ण कुदळवाडी परिसर हादरून गेला. या मोहिमेसाठी प्रशासनाने मोठी यंत्रणा तैनात केली होती. महापालिका आयुक्त डॉ. विजय सूर्यवंशी आणि पोलीस आयुक्त विनयकुमार चौबे स्वतः संपूर्ण कारवाईवर लक्ष ठेवून होते. मोहिमेत बांधकाम विभागाचे १२ उपअभियंते, २४ बीट निरीक्षक आणि मोठ्या संख्येने महापालिका कर्मचारी सहभागी झाले होते. सुरक्षेसाठी सुमारे १२०० पोलीस अधिकारी-कर्मचारी आणि २१८ एमएसएफ जवान तैनात करण्यात आले होते. तसेच १० पोकलेन, १० जेसीबी, ३ अग्निशमन वाहने आणि २ रुग्णवाहिका सज्ज ठेवण्यात आल्या होत्या. कारवाईनंतर महापालिका प्रशासनाने शहरातील अनधिकृत बांधकामांविरोधात पुढेही कठोर भूमिका कायम ठेवण्याचे स्पष्ट संकेत दिले आहेत. “पिंपरी-चिंचवड शहरामध्ये नागरिकांनी कोणत्याही प्रकारची अनधिकृत बांधकामे उभारू नयेत. नियमबाह्य बांधकामांविरोधात महानगरपालिका प्रशासनाची कारवाई यापुढेही सातत्याने सुरू राहणार आहे. नागरिकांनी कायद्याचे पालन करून शहराच्या नियोजनबद्ध विकासाला सहकार्य करावे.” – डॉ. विजय सूर्यवंशी, आयुक्त, पिंपरी-चिंचवड महानगरपालिका
