Kudal Medha Road – मुसळधार पावसाचा परिणाम जावळी तालुक्यातील नदी- नाल्यांवर स्पष्टपणे दिसून येत आहे. कुडाळ गावाच्या हद्दीतील निरंजना नदीच्या पाणीपातळीत मोठी वाढ झाल्याने आणि नदीवरील नवीन पुलाचे बांधकाम सुरु असल्याने प्रशासनाने खबरदारीचा उपाय म्हणून कुडाळ- मेढा मार्ग सर्व प्रकारच्या वाहतुकीसाठी तात्पुरता बंद करण्याचा निर्णय घेतला आहे.

नागरिकांच्या सुरक्षिततेला प्राधान्य देत हा निर्णय घेण्यात आला असून पुढील आदेश येईपर्यंत या मार्गावरील वाहतूक बंद राहणार असल्याचे प्रशासनाने स्पष्ट केले आहे. जावळी तालुक्यात चार दिवसांपासून संततधार पाऊस सुरु आहे. त्यामुळे निरंजना नदीला पूर आला असून नदीच्या प्रवाहाचा वेगही मोठ्या प्रमाणात वाढला आहे. कुडाळ- मेढा मार्गावरील नदीवर नवीन पुलाचे बांधकाम प्रगतीपथावर आहे.

अशा परिस्थितीत वाढलेल्या पाण्याचा प्रवाह आणि बांधकाम सुरु असलेला परिसर लक्षात घेता अपघाताचा धोका लक्षात घेऊन सार्वजनिक बांधकाम विभाग आणि स्थानिक प्रशासनाने तातडीने हा मार्ग बंद करण्याचा निर्णय घेतला. रस्त्याच्या दोन्ही बाजूंना बॅरिकेड्स उभारून वाहतूक रोखण्यात आली आहे. तसेच पर्यायी मार्गांची माहिती देणारे दिशादर्शक फलकही लावण्यात आले आहेत.

प्रशासनाने नागरिकांना बंद मार्गावरून कोणत्याही परिस्थितीत प्रवास करू नये, तसेच बॅरिकेड्स हटवून मार्गाचा वापर करण्याचा प्रयत्न करू नये, असे आवाहन केले आहे. कुडाळ- मेढा मार्ग बंद असल्यामुळे वाहनचालकांनी मेढा- आनेवाडी- दरे- करंदी- आखाडे- हुमगाव- सोमर्डी- शेते- कुडाळ या पर्यायी मार्गाचा वापर करावा, असे प्रशासनाने जाहीर केले आहे. या मार्गावरुन वाहतूक सुरळीत सुरू असून नागरिकांनी सहकार्य करण्याचे आवाहन करण्यात आले आहे.

प्रशासनाने अत्यावश्यक कामाशिवाय पूरग्रस्त किंवा नदीकाठच्या परिसरात जाणे टाळावे, तसेच पावसाळ्यात नदी, ओढे आणि पुलांवरून प्रवास करताना विशेष काळजी घ्यावी, असेही सांगितले आहे. नागरिकांनी अफवांवर विश्वास न ठेवता केवळ प्रशासनाकडून जारी करण्यात येणाऱ्या अधिकृत सूचनांचे पालन करावे, असेही आवाहन करण्यात आले आहे. निरंजना नदीची पाणीपातळी कमी झाल्यानंतर आणि नवीन पुलाच्या परिसरातील परिस्थिती सुरक्षित असल्याची खात्री झाल्यानंतरच कुडाळ- मेढा मार्ग पुन्हा वाहतुकीसाठी खुला करण्यात येईल, असे सार्वजनिक बांधकाम विभागाने स्पष्ट केले आहे.