– मोना शहा
Koyna Express – पश्चिम महाराष्ट्राला पुणे आणि मुंबई या दोन महानगरांशी जोडणारा सर्वसामान्य प्रवाशांसाठी स्वस्त, विश्वासार्ह आणि महत्त्वाचा रेल्वे दुवा म्हणून ओळखल्या जाणार्‍या कोल्हापूर-मुंबई-कोल्हापूर म्हणजेच कोयना एक्स्प्रेसच्या सुरक्षेचा प्रश्न पुन्हा एकदा ऐरणीवर आला आहे. शनिवारी, दि. 29 ऑगस्ट रोजी सायंकाळी कर्जत रेल्वे स्थानकात कोयना एक्स्प्रेसच्या एका डब्याखालील ब्रेक यंत्रणेत तांत्रिक बिघाड झाल्याने प्रवाशांमध्ये एकच खळबळ उडाली.

डब्याला आग लागल्याची भीती निर्माण झाल्याने काही प्रवाशांनी घाबरून रेल्वेतून खाली उड्या मारल्याने काही काळ स्थानकावर अक्षरशः पळापळ झाली. सुदैवाने या घटनेत कोणतीही जीवितहानी झाली नाही मात्र, गर्दीने कायम भरून धावणार्‍या कोयना एक्स्प्रेसच्या जुन्या डब्यांची आणि रेकची देखभाल व सुरक्षिततेचा प्रश्न यानिमित्ताने पुन्हा प्रकर्षाने समोर आला आहे.

छत्रपती शिवाजी महाराज टर्मिनस मुंबई येथे जात असताना खंडाळा घाट उतरून कर्जत स्थानकात दाखल होण्याच्या दरम्यान हा प्रकार घडला. मिळालेल्या माहितीनुसार, कोयना एक्स्प्रेस शनिवारी सायंकाळी खंडाळा घाट उतरून कर्जत स्थानकात दाखल झाली. गाडी प्लॅटफॉर्मवर थांबत असतानाच एका डब्याच्या खाली ब्रेकजवळून मोठ्या प्रमाणात धूर येत असल्याचे प्रवाशांच्या निदर्शनास आले.

ब्रेक बाइंडिंगमुळे ब्रेक पॅड गरम झाल्याने धूर निर्माण झाल्याचे प्राथमिकदृष्टया स्पष्ट झाले. मात्र, मोठ्या प्रमाणात धूर दिसताच काही प्रवाशांना डब्याला आग लागल्याचा समज झाला. त्यामुळे काही प्रवाशांनी घाबरून विरुद्ध बाजूच्या रेल्वे रुळावर उड्या मारल्या. आरडाओरड, गोंधळ आणि पळापळ सुरू झाली. काही क्षणांसाठी कर्जत स्थानकावरील वातावरण तणावपूर्ण बनले.

घटनेची माहिती मिळताच रेल्वे सुरक्षा दल, रेल्वे पोलीस तसेच रेल्वेचे कर्मचारी तातडीने घटनास्थळी दाखल झाले. संबंधित डब्याखालील ब्रेक यंत्रणेची कसून तपासणी करण्यात आली. ब्रेकमध्ये तांत्रिक बिघाडामुळे धूर निर्माण झाल्याचे स्पष्ट झाल्यानंतर परिस्थिती नियंत्रणात आणण्यात आली. सुरक्षिततेची खात्री केल्यानंतर कोयना एक्स्प्रेस मुंबईच्या दिशेने रवाना करण्यात आली. या प्रकारामुळे काही काळ रेल्वे वाहतुकीवर परिणाम झाला.

घटनेचा व्हिडीओही सोशल मीडियावर व्हायरल झाल्याने प्रवाशांमध्ये आणि कोयना एक्स्प्रेसच्या नियमित प्रवाशांमध्ये चर्चेला उधाण आले. कोयना एक्स्प्रेस ही केवळ एक रेल्वेगाडी नसून पश्चिम महाराष्ट्रातील हजारो प्रवाशांच्या दैनंदिन जीवनाचा महत्त्वाचा आधार आहे. महाराष्ट्र कर्नाटक सीमेलगतचा कर्नाटक राज्यातील भाग, कोल्हापूर, सांगली, सातारा, कराड, पुणे परिसरातील प्रवाशांना मुंबईशी जोडणारा स्वस्त आणि सर्वसामान्यांना परवडणारा दुवा म्हणून कोयना एक्स्प्रेसची ओळख आहे.